Read nynorsk 1938 Salmane 81 Bible Online

Salmane 81 - nynorsk 1938 bible

Salmane 81

¹Til songmeisteren, etter Gittit; av Asaf. /[81]

²Syng med fagnad for Gud, vår styrke! Ropa med gleda for Jakobs Gud!

³Set i med song og lat pauka høyrast, den vene citar med harpa!

⁴Blås i lur i månaden, ved fullmåne, på vår høgtidsdag!

⁵For det er ei lov for Israel, ein rett for Jakobs Gud.

⁶Han sette det til eit vitnemål i Josef då han drog ut gjenom Egyptarlandet. - Eit mål som eg ikkje kjende, høyrde eg: /[82][83]

⁷Eg løyste hans oksel frå byrdi, hans hender vart frie frå berekorgi.

⁸I trengsla ropa du, og eg fria deg ut; eg svara deg, løynd i toreskyi, eg prøvde deg ved Meribavatni. Sela.

⁹Høyr, mitt folk, so vil eg vitna for deg! Israel, gjev du vilde høyra på meg:

¹⁰Det skal ikkje finnast nokon annan gud hjå deg, og du skal ikkje tilbeda ein framand gud.

¹¹Eg er Herren din Gud, som førde deg upp frå Egyptarland; lat munnen vidt upp, so eg kann fylla han!

¹²Men folket mitt høyrde ikkje på mi røyst, og Israel vilde ikkje lyda meg.

¹³So let eg dei fara med sitt harde hjarta, so dei skulde ferdast i sine eigne meinråder.

¹⁴Gjev mitt folk vilde høyra på meg, gjev Israel vilde ganga på mine vegar!

¹⁵Snart skulde eg då døyva deira fiendar og venda mi hand imot deira motstandarar.

¹⁶Dei som hatar Herren, skulde smeikja for dei, og deira tid skulde vara æveleg.

¹⁷Og han skulde føda dei med den beste kveite, og eg skulde metta deg med honning frå berget.