Read nynorsk 1938 Salmane 83 Bible Online

Salmane 83 - nynorsk 1938 bible

Salmane 83

¹Ein song, ein salme av Asaf.

²Gud, teg ikkje! Ver ikkje still og haldt deg ikkje roleg, Gud!

³For sjå, dine fiendar bråkar, og dei som hatar deg, lyfter hovudet!

⁴Mot ditt folk legg dei sløge råder, og dei samråder seg mot dei som du vernar.

⁵Dei segjer: Kom, lat oss rydja dei ut, so dei ikkje lenger er eit folk, og Israels namn skal ingen meir koma i hug.

⁶For dei hev av hjarta samrådt seg, mot deg gjer dei samband,

⁷Edoms tjeld og ismaelitane, Moab og hagarenane,

⁸Gebal og Ammon og Amalek, Filistarland med dei som bur i Tyrus.

⁹Ogso Assur hev gjenge i lag med dei, dei låner sin arm til Lots søner. Sela.

¹⁰Gjer med dei som med Midian, som med Sisera, som med Jabin ved Kisons bekk!

¹¹Dei vart øydelagde ved En-Dor, dei vart til møk åt marki.

¹²Far med dei, deira fremste menner, som med Oreb og Se'eb, og med alle deira hovdingar som med Sebah og Salmunna,

¹³dei som segjer: Lat oss hertaka Guds bustader!

¹⁴Min Gud, gjer dei som ein dustkvervel, som agner for vinden!

¹⁵Lik ein eld som brenner ein skog, lik ein loge som set eld på fjell,

¹⁶soleis forfylgje du dei med din storm og skræme dei med ditt uver!

¹⁷Fyll deira andlet med skam, so dei søkjer ditt namn, Herre!

¹⁸Lat dei skjemmast og skræmast æveleg og alltid, lat dei verta skjemde og ganga til grunns!

¹⁹Og lat dei få vita at einast du hev namnet Herre, den Høgste yver heile jordi!