Read nynorsk 1938 Salmane 85 Bible Online

Salmane 85 - nynorsk 1938 bible

Salmane 85

¹Til songmeisteren; av Korahs born; ein salme.

²Herre, du hev fyrr vore nådig mot landet ditt, du gjorde ende på Jakobs fangekår.

³Du tok burt ditt folks misgjerning, du breidde yver all deira synd. Sela.

⁴Du tok burt all din harm, du let din brennande vreide venda um.

⁵Vend um til oss, vår Frelse-Gud, og gjer ende på din uvilje imot oss!

⁶Vil du æveleg vera vreid på oss? Vil du lata din vreide vara frå ætt til ætt?

⁷Vil ikkje du gjera oss levande att, so ditt folk kann gleda seg i deg?

⁸Herre, lat oss sjå di miskunn, og gjev oss di frelsa!

⁹Eg vil høyra kva Gud Herren talar; for han talar fred til sitt folk og til sine trugne - berre dei ikkje vender um att til dårskap.

¹⁰Ja, hans frelsa er nær dei som ottast han, so herlegdom skal bu i vårt land.

¹¹Nåde og sanning skal møta kvarandre, rettferd og fred kyssa kvarandre.

¹²Sanning skal renna upp av jordi, og rettferd skoda ned frå himmelen.

¹³Herren skal og gjeva det som godt er, og vårt land skal gjeva si grøda.

¹⁴Rettferd skal ganga fyre han og stendigt fylgja i fari hans.