Read nynorsk 1938 Salmane 9 Bible Online

Salmane 9 - nynorsk 1938 bible

Salmane 9

¹Til songmeisteren, etter Mut-labbén; ein salme av David. /[10]

²Eg vil lova Herren av alt mitt hjarta, eg vil kunngjera alle dine under.

³Eg vil gleda og fagna meg i deg, eg vil lovsyngja ditt namn, du Høgste,

⁴av di mine fiendar vik attende, dei snåvar og gjeng til grunns for di åsyn.

⁵For du hev ført fram min rett og mi sak, du hev sett deg på domstolen som rettferdig domar.

⁶Du hev aga heidningane, øydt ut dei ugudlege, stroke ut deira namn æveleg og alltid.

⁷Husi åt fiendane er lagde i røys for all tid, byane hev du støytt ned til grunns, deira minne, det hev døytt ut.

⁸Men Herren tronar til æveleg tid, han hev reist sin stol til doms,

⁹og han dømer jordriket med rettferd, segjer dom yver folki med rettvisa.

¹⁰Og Herren er ei borg for den som er trælka, ei borg i dei tider han er i trengd.

¹¹Og dei som kjenner ditt namn, set si lit til deg; for du forlet ikkje dei som søkjer deg, Herre!

¹²Syng lovsong til Herren som bur på Sion, kunngjer millom folki hans store gjerningar!

¹³For han som hemner blod, kjem dei arme i hug, han gløymer ikkje deira skrik.

¹⁴Ver meg nådig, Herre! Sjå kva eg må lida av dei som hatar meg, du som lyfter meg upp frå daudens portar,

¹⁵so eg kann kunngjera all din pris i portane åt Sions dotter, fagna meg i di frelsa.

¹⁶Heidningane er sokne i den gravi dei grov; deira fot er fanga i det garnet dei løynde.

¹⁷Herren hev gjort seg kjend, han hev halde dom; han fangar den ugudlege i det verket hans eigne hender gjorde. Higgajon. Sela. /[11]

¹⁸Dei ugudlege skal fara ned til helheimen, alle heidningane, som gløymer Gud.

¹⁹For den fatige vert ikkje gløymd for all tid, voni åt dei spaklyndte ikkje spillt i all æva.

²⁰Statt upp, Herre! Lat ikkje menneske få makt, lat heidningane verta dømde for di åsyn!

²¹Set redsla i dei, Herre! Lat heidningane kjenna at dei er menneske! Sela.