Read nynorsk 1938 Salmane 90 Bible Online

Salmane 90 - nynorsk 1938 bible

Salmane 90

¹Ei bøn av Moses, gudsmannen. Herre, du hev vore ein bustad for oss frå ætt til ætt.

²Fyrr fjelli vart til, og du skapte jordi og heimen, ja frå æva og til æva er du, Gud.

³Du let menneskja verta til dust att og segjer: Vend um att, de mannsborn!

⁴For tusund år er i dine augo som dagen i går når han lid, som ei vakt um natti.

⁵Du riv dei burt som i flaum, dei vert som ein svevn. Um morgonen er dei som groande graset;

⁶um morgonen blømer det og gror, um kvelden visnar det burt og turkast upp.

⁷For me hev forgjengest ved din vreide, og ved din harm er me burtskræmde.

⁸Du hev sett våre misgjerder for augo dine, vår løynde synd i ljoset frå di åsyn.

⁹For alle våre dagar er framfarne i din vreide; me hev levt våre år til ende som ein sukk.

¹⁰Vår livstid, ho varer sytti år, og når der er mykje kraft, åtti år, og jamvel det stoltaste er møda og fåfengd; for snøgt vart me drivne fram, og me flaug av stad.

¹¹Kven kjenner styrken i din vreide, og din harm, soleis som ein bør ottast deg?

¹²Å telja våre dagar, det lære du oss, so me kann få visdom i hjarta!

¹³Vend um, Herre! Kor lenge? Ynkast yver tenarane dine!

¹⁴Metta oss med di miskunn når morgonen renn, so vil me fegnast og gleda oss alle våre dagar!

¹⁵Gled oss so mange dagar som du hev plaga oss, so mange år som me hev set ulukka!

¹⁶Lat di gjerning syna seg for tenarane dine og din herlegdom yver deira born!

¹⁷Og Herrens, vår Guds ynde vere yver oss, og det våre hender gjer, gjeve du framgang for oss, ja, det våre hender gjer, det gjeve du framgang!