Read nynorsk 1938 Salmane 92 Bible Online

Salmane 92 - nynorsk 1938 bible

Salmane 92

¹Ein salme, ein song til sabbatsdagen.

²Det er godt å prisa Herren og å syngja ditt namn lov, du Høgste,

³å kunngjera di miskunn um morgonen og din truskap um nætene,

⁴med tistrengs-citar og med harpa, med tankefullt spel på citar.

⁵For du hev gledt meg, Herre, med ditt verk; eg fegnast yver det dine hender hev gjort.

⁶Kor store dine gjerningar er, Herre! Ovdjupe er dine tankar.

⁷Ein uvitug mann kjenner ikkje til det, og ein dåre skynar ikkje slikt.

⁸Når dei ugudlege grønkast som graset, og alle illgjerningsmenner blømer, so er det til deira tyning til æveleg tid.

⁹Men du, Herre, er høg i all æva!

¹⁰For sjå, dine fiendar, Herre - for sjå, dine fiendar forgjengst; alle illgjerningsmenner vert spreidde.

¹¹Du lyfter upp mitt horn som hornet åt villuksen; frisk olje er rent yver meg.

¹²Og mitt auga ser med lyst på mine fiendar; mine øyro høyrer med gleda um dei vonde som stend upp imot meg.

¹³Den rettferdige grønkast som palmetreet, som ein seder på Libanon veks han.

¹⁴Dei er planta i Herrens hus, dei blømer i vår Guds fyregardar.

¹⁵Endå i høg alder skyt dei friske renningar; dei er saftfulle og grøne,

¹⁶so dei skal kunngjera at Herren er rettvis, han, mitt berg, og at det ingen urett er i han.