Read nynorsk 1938 Salmane 94 Bible Online

Salmane 94 - nynorsk 1938 bible

Salmane 94

¹Herre, du hemns Gud, du hemns Gud, syn deg i herlegdom!

²Statt upp, du domar yver jordi, lat dei ovmodige få lika for si gjerning!

³Kor lenge skal dei ugudlege, Herre, kor lenge skal dei ugudlege fegnast?

⁴Dei gøyser or seg og fører skamlaus tale; dei skrøyter, alle ugjerningsmenner.

⁵Ditt folk, Herre, krasar dei, og din arv plagar dei.

⁶Enkja og den framande slær dei i hel, og farlause myrder dei.

⁷Og dei segjer: Herren ser ikkje, og Jakobs Gud gaumar ikkje etter.

⁸Gjev då gaum, de uvituge i folket! Og de dårar, når vil de taka til vitet?

⁹Han som hev sett inn øyra, skulde han ikkje høyra? Han som hev laga til auga, skulde han ikkje sjå?

¹⁰Han som tuktar heidningane, skulde han ikkje refsa, han som gjev menneski vit?

¹¹Herren kjenner mannsens tankar, han veit at dei er fåfengd.

¹²Sæl er den mann som du, Herre, tuktar og gjev lærdom or di lov,

¹³so han skal få ro for vonde dagar, til dess det vert grave ei grav for den ugudlege.

¹⁴For ikkje støyter Herren burt sitt folk, og arven sin forlet han ikkje;

¹⁵for domen skal venda um att til rettferd, og alle som er ærlege i hjarta, skal halda med han.

¹⁶Kven stend upp for meg imot dei vonde? Kven stig fram for meg mot dei som gjer urett?

¹⁷Dersom ikkje Herren var mi hjelp, so vilde sjeli mi snart bu i den stille helheimen.

¹⁸Når eg segjer: Foten min er ustød, då held di miskunn meg uppe, Herre!

¹⁹Når hjarta vert fullt av urolege tankar, då huggar di trøyst mi sjel.

²⁰Er vel tynings-domstolen i samlag med deg, der dei lagar urett i hop so det ser ut som rett?

²¹Dei flokkar seg i hop mot sjeli åt den rettferdige, og skuldlaust blod fordømer dei.

²²Då vert Herren ei borg for meg, og min Gud vert eit berg som eg flyr til.

²³Og han let deira urett koma attende yver dei, og for deira vondskap skal han gjera ende på dei; ja, Herren vår Gud, skal gjera ende på dei.