Read nynorsk 1938 Salomos ørdtøke 13 Bible Online

Salomos ørdtøke 13 - nynorsk 1938 bible

Salomos ørdtøke 13

¹Ein vis son let seg aga av far sin, men ein spottar høyrer ikkje på skjenn.

²Sjølv fær ein godt av den frukt som munnen ber, men hugen åt svikarane stend etter vald.

³Den som aktar munnen sin, varar sitt liv; den som er lausmynt, fær seg ei ulukka.

⁴Letingen lyster og fær ikkje noko, men strevsame folk fær rikleg mette.

⁵Den rettferdige hatar ljugarord, men den ugudlege fer stygt og skamleg åt.

⁶Rettferd varar den som lever ulastande, men gudløysa feller den som gjer synd.

⁷Ein ter seg rik og eig då inkje, ein annan ter seg fatig og eig mykje.

⁸Mannsens rikdom er løysepengar for livet hans, men fatigmannen er det ingen som trugar.

⁹Ljoset åt dei rettferdige brenn lystigt, men lampa åt dei ugudlege sloknar.

¹⁰Med ovmod valdar ein berre tretta, men hjå dei som tek imot råd, er visdom.

¹¹Lettfengen rikdom minkar, men den som sankar smått um senn, fær meir og meir.

¹²Langvarig venting gjer hjarta sjukt, men uppfyllt ynske er eit livsens tre.

¹³Den som vanvyrder ordet, tyner seg sjølv; men den som ottast bodet, han fær løn.

¹⁴Vismanns læra er ei livsens kjelda, so ein slepp undan daudesnaror.

¹⁵Godt vit gjev manntekkje, men hard er vegen som svikarar gjeng.

¹⁶Kvar som er klok, fer fram med vit, men ein dåre briskar seg med dårskap.

¹⁷Ein ugudleg bodberar fell i ulukka, men eit trufast sendebod er lækjedom.

¹⁸Armod og skam fær den som viser age ifrå seg; men den som aktar på refsing, vinn æra.

¹⁹Uppfyllt ynske er søtt for sjeli, men å halda seg frå vondt er ein styggedom for dårar.

²⁰Søk lag med dei vise, so vert du vis; men ille gjeng det den som er ven med dårar.

²¹Ulukka forfylgjer syndarar, men rettferdige fær godt til løn.

²²Den gode let etter seg arv til barneborn, men det syndaren eig, er gøymt åt den rettferdige.

²³Fatigfolks nybrot gjev rikleg føda; men mang ein vert tynt av di han gjer urett.

²⁴Den som sparer riset sitt, hatar son sin; men den som elskar han, tuktar honom tidleg.

²⁵Den rettferdige fær eta seg mett, men dei ugudlege gjeng med magen tom.