Read nynorsk 1938 Salomos ørdtøke 18 Bible Online

Salomos ørdtøke 18 - nynorsk 1938 bible

Salomos ørdtøke 18

¹Einstødingen fylgjer berre sin eigen hug; mot alle kloke råder glefser han.

²Dåren bryr seg ikkje um å vera vitug, men vil berre visa kva som bur i han.

³Kjem ein ugudleg, so kjem og vanvyrdnad, og med skam fylgjer spott.

⁴Ordi i ein manns munn er djupe vatn, visdoms kjelda er ein bekk som vell fram.

⁵Det er ille når ein held med saka mann og rengjer retten for den som er saklaus.

⁶Dårelippor valdar tretta, og munnen hans ropar etter hogg.

⁷Dåremunn er til ulukka for han sjølv, og lippone er ei snara for hans liv.

⁸Baktalar-ord er som lostemat, og dei sig ned i inste hjarta.

⁹Den som er lat i arbeidet sitt, han er og bror til øydaren.

¹⁰Herrens namn er eit tårn so sterkt; dit spring den rettferdige og vert berga.

¹¹Rikmanns eiga er hans faste by, som høge muren i hans eigne tankar.

¹²Fyre fall er mannsens hjarta stolt, men fyre æra gjeng audmykt.

¹³Når nokon svarar fyrr han høyrer, vert det til dårskap og til skam for han.

¹⁴Modet held mannen uppe i hans sjukdom; men brote mod - kven kann vel bera det?

¹⁵Vitug manns hjarta kjøper kunnskap, og øyra åt vismenner søkjer kunnskap.

¹⁶Gåva opnar mannen veg og fører han fram for storfolk.

¹⁷Den som fyrst legg fram si sak, fær rett; men so kjem motparten og granskar ordi hans.

¹⁸Lutkasting gjer ende på trettor og skil millom mektige menner.

¹⁹Hev ein bror lide urett, er han verre å vinna enn ei festning, og tretta med han er som bom for ei borg.

²⁰Mannen fær magen sin mett av frukti or munnen sin; av grøda frå lippone vert han mett.

²¹Tunga hev daude og liv i sitt vald, og alle som gjerne brukar henne, skal eta hennar frukt.

²²Den som hev funne ei kona, hev funne lukka og fenge ei nådegåva av Herren.

²³Den fatige bed og barmar seg, men den rike svarar med harde ord.

²⁴Ein mann med mange vener gjeng det ille; men det finst vener som er trugnare enn nokon bror.