Read nynorsk 1938 Salomos ørdtøke 2 Bible Online

Salomos ørdtøke 2 - nynorsk 1938 bible

Salomos ørdtøke 2

¹Son min! Tek du imot mine ord og gøymer bodi mine hjå deg,

²so du vender øyra til visdomen og bøygjer hjarta til klokskapen,

³ja, kallar du på skynet og ropar høgt på vitet,

⁴leitar du etter det som vore det sylv, og grev som vore det løynde skattar,

⁵då skal du skyna otte for Herren, og kunnskap um Gud skal du finna.

⁶For Herren er den som gjev visdom, frå hans munn kjem kunnskap og vit.

⁷Han gøymer frelsa for dei ærlege, han er ein skjold for dei som lever ulastande;

⁸for han vaktar stigane åt retten og varar vegen vel for sine trugne.

⁹Då skal du skyna rettferd og rett og rettvisa, ja kvar god veg.

¹⁰For visdom skal koma i ditt hjarta, og kunnskap skal gleda di sjel;

¹¹ettertanke skal halda vakt yver deg, vit skal vara deg

¹²og fria deg frå vonde vegar, frå folk som fer med rang tale,

¹³dei som gjeng frå dei rette stigar og vil ferdast på myrke vegar,

¹⁴som gleder seg når dei fær gjera vondt, og fegnast yver rang og vond åtferd,

¹⁵som gjeng på krokute stigar og fylgjer range vegar.

¹⁶Visdomen skal fria deg frå annanmanns kona, frå framand kvinna, som talar sleipe ord,

¹⁷som hev svike sin ungdoms ven og hev gløymt si Guds-pakt;

¹⁸for hennar hus sig ned i dauden, og ned til daudingane ber hennar vegar;

¹⁹dei som gjeng inn til henne, kjem aldri attende, og dei når aldri livsens stigar.

²⁰Visdomen skal hjelpa deg til å ganga den vegen dei gode gjeng, og halda deg på dei stigane der dei rettferdige ferdast;

²¹for dei ærlege skal bu i landet, og dei ulastande skal verta att der,

²²men dei ugudlege skal rydjast ut or landet, og svikarane skal verta rivne burt frå det.