Read nynorsk 1938 Salomos ørdtøke 20 Bible Online

Salomos ørdtøke 20 - nynorsk 1938 bible

Salomos ørdtøke 20

¹Vinen er ein spottar, rusdrykken ein ståkar, og ingen som ragar av han, er vis.

²Den redsla kongen vekkjer, er som løveburing; den som argar han, set livet sitt på spel.

³Mannsens æra er å halda seg frå tretta, men kvar uviting glefser til.

⁴Letingen vil ikkje pløgja um hausten; i skurdonni leitar han fåfengt etter grøda.

⁵Tankane i mannsens hjarta er som djupt vatn, men ein vitug mann kann draga det upp.

⁶So mange ropar høgt, kvar um sin kjærleik; men kven finn vel ein mann som er å lita på?

⁷Den rettferdige ferdast ulastande; sæle er borni hans etter han.

⁸Ein konge som sit i domarsætet, skil ut alt vondt med augo sine.

⁹Kven kann segja: Eg hev reinsa hjarta, eg er fri frå syndi mi?

¹⁰Tvo slag vekt og tvo slag mål er båe tvo ein styggedom for Herren.

¹¹Alt guten syner i si gjerd um ferdi hans vert rein og rett.

¹²Øyra som høyrer, og auga som ser - Herren hev skapt dei båe tvo.

¹³Elska ikkje svevn, for då vert du fatig! Lat upp augo, so fær du brød til mette.

¹⁴Klent, klent! segjer kjøparen; men når han gjeng burt, so rosar han seg.

¹⁵Vel finst det gull og mange perlor, men dyraste eiga er kunnige lippor.

¹⁶Tak klædi hans, for han hev borga for ein annan, og panta han for framande!

¹⁷Søtt er for mannen det brød han hev fenge med fals, men sidan vert munnen hans full av småstein.

¹⁸Råder fær framgang ved rådleggjing; søk då rettleiding når du fører krig!

¹⁹Den som fer med baktale, ber løyndomar ut, og den som er lausmynt, skal du ikkje hava noko med.

²⁰Den som bannar far og mor, hans lampa skal slokna i kolmyrkret.

²¹Ein arv som ein i fyrstningi hev rive til seg, vert på slutten utan velsigning.

²²Seg ikkje: Eg vil løna med vondt! Venta på Herren, so hjelper han deg!

²³Tvo slag lodd er ein styggedom for Herren, og den falske vekti er noko vondt.

²⁴Herren styrer mannsens steg; kor kann eit menneske skyna sin veg?

²⁵Fårleg er det for eit menneske å vigsla eitkvart tankelaust og ikkje tenkja yver lovnaden fyrr etterpå. /[4]

²⁶Ein vis konge skil ut dei ugudlege og let hjulet ganga yver dei.

²⁷Åndi i mennesket er ei Herrens lampa; ho ransakar alle løynrom i hjarta.

²⁸Miskunn og sannleik er ei vakt um kongen, og han styd sin kongsstol med miskunn.

²⁹Ei pryda for ungdomar er deira kraft, og ei æra for dei gamle er grått hår.

³⁰Ei tukteråd for dei vonde er flengjor og sår og slag, som kjennest i inste hjarta.