Read nynorsk 1938 Salomos ørdtøke 21 Bible Online

Salomos ørdtøke 21 - nynorsk 1938 bible

Salomos ørdtøke 21

¹Konge-hjarta er i Herrens hand som bekker, han vender det kvar helst han vil.

²Ein mann tykkjer at all hans ferd er rett, men det er Herren som prøver hjarto.

³At folk gjer rett og skil, er meir verdt for Herren enn offer.

⁴Stolte augo og ovmodigt hjarta - lampa åt ugudlege folk vert til synd for dei. /[5]

⁵Tankane hjå den annsame fører berre til vinning, men hastverk berre til tap.

⁶Den rikdom ein vinn med ljugartunga, er ein kvervande pust, og han fører til dauden.

⁷Den vald dei ugudlege gjer, skal riva dei sjølve burt, av di dei ikkje vilde gjera det som rett er.

⁸Skyldtyngd mann gjeng krokut veg, men den reine fer ærleg fram.

⁹Betre å bu i ei krå på taket enn hava hus i hop med trettekjær kvinna.

¹⁰Ugudleg manns sjel hev hug til det vonde; hans næste finn ikkje miskunn hjå han.

¹¹Refser du spottaren, vert uvitingen vis, og lærer du vismannen, tek han mot kunnskap.

¹²Den Rettferdige aktar på gudløysings hus; han støyter dei gudlause ned i ulukka. /[6]

¹³Den som dytter øyra til for armings rop, han skal sjølv ropa og ikkje få svar.

¹⁴Gåva i løyndom stiller vreide, og gjeving i løynd stiller største harmen.

¹⁵Det er ei gleda for rettferdig mann å gjera rett, men ei redsla for illgjerningsmenner.

¹⁶Den som viller seg burt frå klokskaps veg, han skal hamna i skuggeheimen.

¹⁷Fatig vert den som elskar moro; den som elskar vin og olje, vert ikkje rik.

¹⁸Den ugudlege vert løysepengar for den rettferdige, og den utrue kjem i staden for dei ærlege.

¹⁹Betre å bu i eit øydeland enn hjå arg og trettekjær kvinna.

²⁰Den vise hev dyre skattar og olje i huset, men dåren øyder det upp.

²¹Den som strevar etter rettferd og miskunn, han skal finna liv og rettferd og æra.

²²Vismannen stormar ein by full av kjempor og bryt ned den borgi som byen leit på.

²³Den som varar sin munn og si tunga, han friar sitt liv frå trengslor.

²⁴Den kaute og stolte kallar me spottar; han fer fram med ofseleg ovmod.

²⁵Lysti åt letingen drep honom sjølv, for hendene hans vil ingen ting gjera.

²⁶Heile dagen er han full av trå; men den rettferdige gjev og sparer ikkje.

²⁷Ein styggedom er det når gudlause folk kjem med offer, og endå meir når dei samstundes emnar på vondt.

²⁸Eit ljugarvitne skal ganga til grunns, men ein mann som lyder etter, skal få tala alltid.

²⁹Ein ugudleg mann ter seg skamlaus, men den ærlege gjeng vegen sin ende fram.

³⁰Det finst ingen visdom og inkje vit og ingi råd imot Herren.

³¹Hesten vert budd til herferdsdagen, men sigeren kjem ifrå Herren.