Read nynorsk 1938 Salomos ørdtøke 29 Bible Online

Salomos ørdtøke 29 - nynorsk 1938 bible

Salomos ørdtøke 29

¹Ein mann som etter mykje refsing endå er ein stivnakke, vil brått verta broten ulækjeleg sund.

²Når dei rettferdige kjem til makti, gled folket seg; men når ein ugudleg mann råder, sukkar folket.

³Ein mann som elskar visdom, gleder far sin; men den som hev lag med skjøkjor, øyder eiga si.

⁴Ein konge tryggjer landet sitt med rett; men ein mann som tek imot reidor, legg det i øyde.

⁵Ein mann som smeikjer for næsten sin, breider ut eit garn for foten hans.

⁶Ein vond manns misgjerd er ei snara for han, men den rettferdige skal fegnast og gleda seg.

⁷Den rettferdige syter for småfolks sak; den ugudlege hev ikkje vit på noko.

⁸Spottarar øser upp ein by, men vismenner stiller vreiden.

⁹Når ein vismann fører sak mot ein dåre, vert dåren sinna og lær, og det vert ikkje fred.

¹⁰Dei blodfuse hatar den lastelause, men dei ærlege freistar å berga hans liv.

¹¹Alt sitt sinne slepper dåren ut, men vismannen held sinnet att og døyver det.

¹²Ein hovding som aktar på lygneord, fær berre ugudlege tenarar.

¹³Fatigmann og valdsmann råkast; Herren gjev dei båe augneljos.

¹⁴Ein konge som dømer småfolk rett, hans kongsstol stend fast for alle tider.

¹⁵Ris og age gjev visdom; men ein van-aga gut fører skam yver mor si.

¹⁶Når dei ugudlege fær makt, fær syndi makt; men dei rettferdige skal sjå på deira fall med hugnad.

¹⁷Aga son din, so vert han deg til hugnad og kveikjer sjeli di.

¹⁸Utan profetsyn vert folket agelaust; men sæl er den som held lovi.

¹⁹Med ord let trælen seg ikkje aga; for han skynar dei vel, men lyder dei ikkje.

²⁰Ser du ein mann som er snar til å tala - det er større von for dåren enn for han.

²¹Kjæler ein trælen sin upp frå hans ungdom, so vil han til slutt vera son i huset.

²²Snarsint mann valdar tretta, og brålyndt mann gjer mang ei misgjerd.

²³Mannsens ovmod fører han til fall, men den audmjuke vinn seg æra.

²⁴Den som helar med tjuven, hatar sitt liv; han høyrer dei tek han i eid, men gjev ingi vitring.

²⁵Otte for menneske fører i snara, men den som lit på Herren, vert berga.

²⁶Mange søkjer godhug hjå ein hovding, men frå Herren fær mannen sin rett.

²⁷Ein urettferdig mann er ein styggedom for dei rettferdige, og ein styggedom for den ugudlege er den som lever rett.