Read nynorsk 1938 Salomos ørdtøke 3 Bible Online

Salomos ørdtøke 3 - nynorsk 1938 bible

Salomos ørdtøke 3

¹Son min! Gløym ikkje læra mi, og lat hjarta varveitsla bodi mine!

²For langt liv og mange leveår og fred skal dei gjeva deg i rikt mål.

³Lat ikkje kjærleik og truskap vika frå deg, men bitt dei um halsen på deg, skriv dei på di hjartetavla!

⁴Då fær Gud og menneske godhug for deg og held deg for ein mann med god vit.

⁵Lit på Herren av heile ditt hjarta, og set ikkje lit til ditt vit!

⁶Tenk på han på alle dine vegar! So jamnar han dine stigar.

⁷Ver ikkje vis i eigne augo, ottast Herren og vik frå det vonde!

⁸Det vert til helsebot for holdet ditt og kveik for beini dine.

⁹Æra Herren med gåvor av eiga di og med fyrstegrøda av all di avling!

¹⁰Då vert dine løor rikleg fyllte, og druvesafti renn yver i persone dine.

¹¹Son min! Vanvyrd ikkje Herrens age, og ver ikkje utolug når han refser deg!

¹²For Herren agar den han elskar, som ein far agar den son han hev kjær.

¹³Sæl den mann som hev funne visdom, den mann som vinn seg vit!

¹⁴For det er betre å råda seg visdom enn sylv, og den vinning han gjev, er betre enn gull.

¹⁵Dyrare er han enn perlor, av alle dine skattar er ingen som han.

¹⁶Langt liv hev han i høgre handi, i vinstre rikdom og æra.

¹⁷Hans vegar er hugnads-vegar, og alle hans stigar fører til lukka.

¹⁸Han er eit livsens tre for dei som grip han, og alle som held han fast, lyt ein prisa sæle.

¹⁹Herren grunnfeste jordi med visdom; han bygde himmelen med vit.

²⁰Ved hans kunnskap fossa vatnet or djupi, og frå skyene dryp det dogg.

²¹Son min! Slepp ikkje augo av dei, tak vare på visdom og klokskap!

²²So skal dei vera liv for sjeli di og prydnad um halsen din.

²³Då vandrar du trygt din veg og støyter ikkje din fot.

²⁴Når du legg deg, ottast du ikkje, og når du hev lagt deg, søv du so godt.

²⁵Då tarv du ikkje ottast for bråstøkk, eller for uveret når det kjem yver dei ugudlege.

²⁶For Herren skal vera di tiltru, og han skal vara din fot frå snara.

²⁷Neitta ingen di hjelp som treng um henne, når det stend i di makt å hjelpa.

²⁸Seg ikkje til næsten din: Gakk din veg og kom att, eg skal gjeva deg i morgon - når du kann gjera det straks.

²⁹Legg ikkje upp meinråder mot næsten din, når han kjenner seg trygg hjå deg!

³⁰Tretta ikkje med nokon utan grunn, når han ikkje hev gjort deg noko vondt!

³¹Ovunda ikkje ein valdsmann, og vel ikkje nokon av alle hans vegar!

³²For den falske er ein styggedom for Herren, men med dei ærlege hev han samlag.

³³Herrens forbanning er yver huset åt den gudlause, men heimen åt dei rettferdige velsignar han.

³⁴Gjeld det spottarar, so spottar han, men dei audmjuke gjev han nåde.

³⁵Vismenner erver æra, men dårer fær skam til løn.