Read nynorsk 1938 Salomos ørdtøke 31 Bible Online

Salomos ørdtøke 31 - nynorsk 1938 bible

Salomos ørdtøke 31

¹Ord av kong Lemuel, den lærdomen som mor hans prenta inn i han:

²Kva skal eg segja til deg, son min, du mitt livs son, du min lovnads-son?

³Gjev ikkje kvinnor di kraft, og gakk ikkje vegar som fører til tyning for kongar!

⁴Det sømer seg ikkje for kongar, Lemuel, det sømer seg ikkje for kongar å drikka vin, og ikkje for hovdingar å drikka rusdrykk.

⁵For drikk dei, gløymer dei kva som er lov, og rengjer retten for kvar armodsmann.

⁶Lat han få rusdrykk som mest gjeng til grunns, og han få vin som gjeng med sorg i sjeli!

⁷Lat han få drikka, so han gløymer all si armod og ikkje lenger kjem i hug si møda!

⁸Lat upp din munn for mållaus mann, for alle deira sak som gjeng mot undergang!

⁹Lat upp din munn og døm rettferdigt, hjelp armingen og fatigmannen til hans rett!

¹⁰Ei dugande kona - kven finn vel ei slik? Mykje meir er ho verd enn perlor.

¹¹Hjarta åt mannen lit på henne, og vinning skortar det ikkje på.

¹²Ho gjer han godt og inkje vondt alle sine levedagar.

¹³Ho syter for ull og lin, og hendene strevar med hugnad.

¹⁴Ho er liksom kjøpmanns-skip; langt burtantil fær ho si føda.

¹⁵Uppe er ho i otta og gjev sin huslyd mat og ternone arbeid for dagen.

¹⁶Ho stilar på ein åker og fær han; ho plantar ein vingard for det som ho tener med hendene.

¹⁷Kraft spenner ho um seg til belte og gjer sine armar sterke.

¹⁸Ho merkar at hushaldet hennar gjeng godt; hennar lampa sloknar ikkje um natti.

¹⁹Ho legg hendene sine på rokken, og fingrane tek til teinen.

²⁰Ho opnar handi for armingen, retter hendene ut til fatigmannen.

²¹Ho ottast ikkje snøen for huset sitt; for heile hennar hus er klædt i skarlaksty.

²²Ho gjer seg teppe; ho hev klæde av finaste lin og purpur.

²³Hennar mann er kjend i portane, der han sit i lag med dei fremste i landet.

²⁴Linskjortor gjer ho og sel, og belte gjev ho til kræmaren.

²⁵Kraft og vyrdnad er klædnaden hennar, og ho lær åt den komande tid.

²⁶Ho let upp munnen med visdom, og mild rettleiding hev ho på tunga.

²⁷Ho ser etter korleis det gjeng i huset, og et ikkje brød i letingskap.

²⁸Hennar søner stig fram og prisar ho sæl, og mannen stig fram og rosar henne:

²⁹Mange dugande kvinnor finst det, men du gjeng yver dei alle.

³⁰Venleik er fals og fagerleik fåfengd; ei kvinna som ottast Herren, skal prisast.

³¹Lat henne njota frukti av sitt arbeid, og hennar verk skal prisa ho i portane.