Read nynorsk 1938 Salomos ørdtøke 4 Bible Online

Salomos ørdtøke 4 - nynorsk 1938 bible

Salomos ørdtøke 4

¹Høyr etter, born, når ein far tuktar, og gjev gaum, so de kann læra klokskap!

²For ein god lærdom gjev eg dykk; mine bod må de ikkje ganga frå.

³For då eg var son heime hjå far min, då eg var liten og einaste guten åt mor mi,

⁴då lærde han meg og sa til meg: Lat hjarta ditt halda fast på mine ord, tak vare på mine bod, so skal du leva.

⁵Kjøp deg visdom, kjøp deg vit, gløym ikkje og vik ikkje frå ordi eg segjer!

⁶Gakk ikkje frå visdomen, so skal han vakta deg; elska han, so skal han vara deg.

⁷Upphavet til visdom er: Kjøp deg visdom, ja, kjøp deg vit for all di eiga!

⁸Set han høgt, so skal han upphøgja deg; han fører deg til æra, når du tek han i fang.

⁹Han set på ditt hovud ein fager krans, han gjev deg ei prydeleg kruna.

¹⁰Høyr, son min, og tak imot mine ord, so vert dine leveår mange.

¹¹Eg viser deg visdoms veg, eg leider deg på rettvise-stigar

¹²Når du gjeng, skal du stiga fritt, og når du spring, skal du ikkje snåva.

¹³Haldt fast på min age, slepp han ikkje! Tak vare på han, for han er ditt liv.

¹⁴På gudlause-stig må du ikkje koma, ikkje fylgja den vegen dei vonde gjeng.

¹⁵Haldt deg burte frå han, fylg han ikkje, vik frå han og gakk utanum!

¹⁶For dei fær ikkje sova minder dei hev gjort eitkvart vondt, og dei misser svevnen, hev dei ikkje fenge einkvar til å falla.

¹⁷For dei et gudløyse-brød og drikk valdsverks vin.

¹⁸Men den stigen dei rettferdige gjeng, er lik morgonglima, som vert bjartare og bjartare til det er ljos dag.

¹⁹Den vegen dei ugudlege gjeng, er som kolmyrkret; dei veit ikkje kva dei snåvar i.

²⁰Son min! Akta på ordi mine, lut øyra ned til det eg segjer!

²¹Slepp dei ikkje utor augo, vara dei djupt i hjarta!

²²For dei er liv for kvar som finn dei, og lækjedom for heile hans lekam.

²³Tak vare på hjarta framfor alt som du vaktar; for livet gjeng ut frå det.

²⁴Haldt deg ifrå svikfulle ord, og burt med falske lippor!

²⁵Lat augo dine sjå beint fram og augnekasti skoda ende fram for deg!

²⁶Jamna stigen for din fot, og lat alle dine vegar vera støde!

²⁷Tak ikkje or leidi, korkje til høgre eller vinstre, vend foten ifrå det vonde!