Read nynorsk 1938 Salomos ørdtøke 7 Bible Online

Salomos ørdtøke 7 - nynorsk 1938 bible

Salomos ørdtøke 7

¹Son min, tak vare på ordi mine og gøym min bod hjå deg!

²Tak vare på bodi mine, so skal du leva, og på læra mi som din augnestein!

³Bitt dei på fingrane dine, skriv dei på hjartetavla!

⁴Seg til visdomen: Du er mi syster, og kalla vitet din kjenning,

⁵so dei kann vara deg frå annanmanns kona, frå framande kvinnor, som talar sleipe ord.

⁶For gjenom vindauga i huset mitt, gjenom tralene skoda eg ut;

⁷då såg eg millom dei urøynde, eg gådde millom dei unge ein uviting,

⁸som gjekk framum på gata burtmed hyrna hennar og tok vegen til hennar hus,

⁹i skumingi, då det kvelda, i kolmyrke svarte natti.

¹⁰Då kom ei kvinna imot han i skjøkjebunad og innful i hjarta.

¹¹Vill er ho og styrlaus; heime hev hennar føter ikkje ro.

¹²Snart er ho på gata, snart på torgi, og attmed kvart hyrna stend ho på lur.

¹³Ho tok fat på han og kysste han, og med ubljug uppsyn sa ho til han:

¹⁴Takkoffer skulde eg bera fram, og i dag hev eg løyst mine lovnader;

¹⁵difor gjekk eg ut imot deg, vilde leita deg upp, og eg fann deg.

¹⁶Mi seng hev eg reidt med teppe, med egyptiske roselakan.

¹⁷Eg hev strått utyver mi lega myrra, aloë og kanel.

¹⁸Kom til ein kjærleiks rus alt til morgons, lat oss hyggja oss saman i elskhug!

¹⁹For mannen er ikkje heime, han er faren på langferd;

²⁰pengepungen tok han med seg, ved fullmånetid kjem han heim.

²¹Ho fekk lokka han med si sterke fyreteljing, med sine sleipe lippor forførde ho han.

²²Han fylgjer henne straks, lik ein ukse som gjeng til slaktarbenken, liksom i fotjarn, som dåren vert tukta med,

²³til dess pili kløyver hans lever - liksom fuglen skundar seg til snara og veit ikkje at det gjeld livet.

²⁴So høyr no på meg, born, og lyd på det munnen min talar!

²⁵Lat ikkje hjarta venda seg til hennar vegar, vill deg ikkje inn på hennar stigar!

²⁶For mange som hev fenge ulivssår, hev ho felt, og stort er talet på dei ho hev drepe;

²⁷frå hennar hus gjeng vegar til helheim, dei gjeng ned til daudens kovar.