Read nynorsk 1938 Salomos ørdtøke 9 Bible Online

Salomos ørdtøke 9 - nynorsk 1938 bible

Salomos ørdtøke 9

¹Visdomsmøyi hev bygt seg hus, ho hev hogge til sine sju stolpar.

²Ho hev slakta sitt slakt og blanda sin vin og attåt duka sitt bord;

³ho hev sendt ut sine ternor, ho ropar ovantil haugane i byen:

⁴Den som er fåkunnig, vende seg hit! Til den som er vitlaus, segjer ho:

⁵Kom og et av mitt brød og drikk av den vin eg hev blanda!

⁶Lat dykkar fåkunna fara, so skal de leva, og gakk beint fram på vegen åt vitet!

⁷Den som refser ein spottar, avlar seg vanæra, og den som lastar ein gudlaus, fær skam av det.

⁸Lasta ikkje spottaren, han vil hata deg! Lasta den vise, han vil elska deg.

⁹Lær den vise, so vert han endå visare; lær den rettferdige, so gjeng han fram i lærdom.

¹⁰Otte for Herren er upphav til visdom, og å kjenna den Heilage er vit.

¹¹For ved meg skal dine dagar aukast, og leveår fær du i rikt mål.

¹²Er du vis, so gagnar det deg sjølv, og er du ein spottar, lyt du lida for det åleine.

¹³Dårskapen er ei kvinna so vill, ho eig ikkje vit, og ingen ting veit ho.

¹⁴Ho sit utfor husdøri si på ein stol høgt uppe i byen

¹⁵og ropar til dei som ferdast på vegen, som gjeng sine stigar beint fram:

¹⁶Den som er fåkunnig, vende seg hit! Til den som er vitlaus, segjer ho:

¹⁷Stole vatn er søtt, og brød som vert ete i løynd, smakar godt.

¹⁸Men han veit ikkje at der bur daudingane, at hennar gjester er i helheims djup.