Read nynorsk 1938 Forkynnaren 10 Bible Online

Forkynnaren 10 - nynorsk 1938 bible

Forkynnaren 10

¹Eiterflugor set illtev og æsing i salven åt salvelagaren; jamvel ein liten grand dårskap skjemmer ut ein mann som stend høgt i visdom og æra.

²Vismanns hug vender til høgre, men dårehugen til vinstre. /[11]

³Og kvar helst dåren gjeng, tryt vitet hans, og han segjer frå til alle at han er ein dåre.

⁴Um hovdings vreide reiser seg mot deg, so gakk ikkje frå din post! For spaklynde hindrar store synder.

⁵Det er ein vond ting som eg hev set under soli - eit mistak som kjem frå makthavaren:

⁶Dårskapen sit i høge sessar, og storfolk lyt sitja lågt.

⁷Eg hev set trælar på hesteryggen og hovdingar ganga på sin fot som trælar.

⁸Den som grev ei grav, kann stupa nedi, og den som riv eit gjerde, kann ormen stinga.

⁹Den som bryt stein, kann få mein av det; den som høgg ved, kann koma ut i fåre.

¹⁰Når øksi er ukvass, og han ikkje hev slipt eggi, so lyt han bruka dess meir makt; men visdomen hev den fyremunen at han gjer alt på rette måten.

¹¹Når ormen sting fyrr ein fær mana, hev manaren inkje gagn av kunsti si.

¹²Ord av vismanns munn er ljuvlege, men lippone på dåren tyner honom sjølv.

¹³Dei fyrste ordi i hans munn er dårskap, og røda endar i fårleg vitløysa.

¹⁴Dåren talar mange ord, endå ingen mann veit kva som skal henda, og kven kann segja han kva som skal henda etter hans tid?

¹⁵Dåren trøytnar av strevet sitt, han som ikkje ein gong veit vegen til byen.

¹⁶Usælt er du land som hev eit barn til konge, og fyrstar som held etarlag um morgonen.

¹⁷Sælt er du land som hev ein adelboren konge, og fyrstar som held sine mål i sømeleg tid, på kara vis og ikkje med fyll!

¹⁸Når latskapen råder, sig bjelkane ned, og let ein hendene hanga, dryp det inn i huset.

¹⁹Til gaman held dei gjestebod, og vinen legg gleda yver livet; alt i hop fær dei for pengar. /[12]

²⁰Ikkje ein gong i tankane må du banna kongen, og ikkje ein gong i ditt sengrom må du banna den rike; for fuglane i lufti ber ljoden burt, og dei fløygde fortel kva du hev sagt.