Read nynorsk 1938 Høgsongen 4 Bible Online

Høgsongen 4 - nynorsk 1938 bible

Høgsongen 4

¹Kor fager du er, min hugnad, kor fager du er! Dine augo er duvor bak sløret ditt; håret ditt er som ein geiteflokk som lægrar seg nedetter Gileadfjellet.

²Dine tenner er som ein flokk med nyklypte sauer, nett komne or lauget; tvillingar hev dei alle, og ingen av dei er utan lamb.

³Dine lippor er som ei skarlaksnor, og munnen er ljuvleg; som eit granateple-brot er din tinning bak sløret ditt.

⁴Din hals er som Davidstårnet, bygt til våpenhus; tusund skjoldar heng på det, alle skjoldar åt kjempone.

⁵Barmen er som tvo rådyrkalvar, tvillingar til eit rådyr, som beiter millom liljor.

⁶Når dagen vert sval og skuggane flyr, vil eg ganga til Myrraåsen og Røykjelsehaugen.

⁷Alt er fagert ved deg, min hugnad, det finst ikkje lyte på deg.

⁸Kom med meg frå Libanon, brur, kom med meg frå Libanon! Skoda ut frå Amanas tind, frå toppen av Senir og Hermon, frå løveheimar, frå panterfjell.

⁹Du hev teke min hug, mi syster, mi brur! Du hev teke min hug med eit einaste augnekast, med ei av lekkjone um din hals.

¹⁰Kor din kjærleik er fager, mi syster, mi brur! Kor mykje betre din kjærleik er enn vin, og angen av dine salvar enn alle angande urter!

¹¹Av honning dryp dine lippor, mi brur. Honning og mjølk er under di tunga, og angen av klædi dine som angen av Libanon.

¹²Ein avstengd hage er mi syster, mi brur, ei avstengd olla, ei forsigla kjelda.

¹³Du skyt upp som ein park av granattre med gildaste frukt, av cyperbuskor og nardeblom,

¹⁴med narde og safran, kalmus og kanel og angetre av alle slag, myrra og aloëtre og alle dei beste angande urter.

¹⁵Ei kjelda i hagane er du, ein brunn med levande vatn og bekker frå Libanon.

¹⁶Vakna, nordanvind, og kom, du sunnanvind! Blås gjenom hagen min, so angen fær strøyma! Gjev min ven vilde koma til hagen sin og eta hans ovgilde frukt!