Read nynorsk 1938 Jesaja 14 Bible Online

Jesaja 14 - nynorsk 1938 bible

Jesaja 14

¹For Herren skal miskunna Jakob og endå ein gong velja ut Israel og lata dei setja bu i landet deira; og utlendingar skal sameina seg med dei og halda seg til Jakobs hus.

²Og folkeslag skal taka dei og føra dei heim att; men Israels hus skal få dei til eigedom i Herrens land og gjera dei til trælar og trælkvinnor. Dei skal få fangevaktarane sine til fangar og råda yver valdsherrane sine.

³På den dagen då Herren gjev deg kvild for di møda og din angest og frå den harde trældomen som vart lagd på deg,

⁴då skal du røysta i med denne spottevisa um kongen i Babel og kveda: Sjå kva ende det hev teke med valdsherren, med trengslestaden!

⁵Herren hev brote sund staven til dei ugudlege, kongsstaven åt hardstyrarane,

⁶som slo folkeslag i harm og med slag på slag, som bøygde folk under seg i vreide og forfylgde dei utan nåde.

⁷All jordi nyt no kvild og ro; dei set i med fagnadrop.

⁸Jamvel cypressane gleder seg yver deg, sedrane på Libanon: Sidan du fall og vart liggjande, stig ingen hitupp og høgg oss ned.

⁹Helheimen der nede vert uroa for di skuld, når han skal taka imot deg; for di skuld vekkjer han daudingar, alle fyrstane på jordi; han får alle folkekongane til å reisa seg frå sine kongsstolar.

¹⁰Alle so tek dei til ords og segjer til deg: So er du og vorten maktlaus som me, no er du vår like!

¹¹Ned til helheimen hev din herlegdom sokke, brusen frå dine harpor; du ligg på ei roti lega, hev makkar til yverbreidsla.

¹²Kor er du ikkje fallen frå himmelen, du strålande stjerna, du son til morgonroden! Kor er du ikkje felt til jordi, du som slo ned folkeslag!

¹³Det var du som sa i hjarta ditt: Eg vil stiga til himmels, høgt yver Guds stjernor vil eg reisa kongsstolen min, eg vil setja meg på gude-ting-fjellet lengst uppe i nord,

¹⁴eg vil stiga upp um skytoppane og gjera meg lik den Høgste.

¹⁵Nei, til helheimen skal du fara, lengst ned i svartaste hola.

¹⁶Dei som ser deg, skal stira på deg, undrast yver deg og segja: Er dette den mannen som skok jordi og fekk kongerike til å skjelva,

¹⁷han som gjorde jordkringen til ei øydemark og reiv ned byane der, og som aldri gav fangane heimlov?

¹⁸Folkekongane dei ligg alle vyrdeleg gravlagde, kvar i sitt hus;

¹⁹men du er slengd burt, langt frå gravi di, som ei vanvyrd grein; du ligg yverbreidd med drepne, som er slegne med sverd, og som vert kasta ned i ei steingrav - lik ein nedtrakka daudskrott.

²⁰Du fær ikkje koma i grav som dei; for landet ditt hev du øydt, og folket ditt hev du drepe; illgjerdsmenns elde skal aldri meir nemnast.

²¹Gjev sønene hans til dreping for misgjerdi åt deira feder! Ikkje skal dei få reisa seg og eigna til seg jordi og fylla verdi med byar.

²²Eg vil reisa meg imot dei, segjer Herren, allhers Gud, og eg skal rydja ut or Babel både namn og leivning, både born og barneborn, segjer Herren.

²³Og eg vil gjera det til heim for bustyvelen og fylla det med søkkjemyrar, og eg skal sopa det burt med tynings-sopa, segjer Herren, allhers Gud.

²⁴Herren, allhers Gud, hev svore og sagt: I sanning som eg hev tenkt, soleis skal det verta, og det eg hev sett meg fyre, det skal hava framgang.

²⁵Eg vil krasa Assur i landet mitt og trakka han under fot på fjelli mine. So skal åket hans verta burtteke, og byrdi hans verta lyft av herdane deira.

²⁶Dette er den råd som Herren hev teke mot all jordi, og dette er den hand som er utrett mot alle folk.

²⁷For Herren, allhers Gud, hev avgjort det, kven kann gjera det um inkje? Hans hand er det som er utrett; kven kann venda henne burt?

²⁸Det året kong Akas døydde, kom denne framsegni:

²⁹Gled deg ikkje, alt Filistarland, for di staven som slo deg, er sundbroten. For or roti åt hoggormen skal det koma fram ein basilisk, og hans frukt er ein fljugande seraform. /[35]

³⁰Dei armaste av dei arme skal finna rikleg føda, og dei fatige få kvila i trygd; men di rot skal eg drepa med hunger, og leivningen av deg skal han slå i hel. /[36]

³¹Jamra deg, du port! Øya deg, du by! Skjelv av redsla, alt Filistarland! For nordantil kjem ein røyk, og i fiendeskarane er det ingen som ligg etter.

³²Kva skal me då svara sendemennene frå heidningfolki? - At Herren hev grunnfest Sion, og at der finn armingane i folket hans livd.