Read nynorsk 1938 Jesaja 19 Bible Online

Jesaja 19 - nynorsk 1938 bible

Jesaja 19

¹Framsegn um Egyptarland. Sjå, Herren fer fram på lette sky og kjem til Egyptarland. Då skjelv avgudane i Egyptarland for han, og hjarta åt egyptarane brånar i brjostet.

²Og eg vil eggja upp egyptar mot egyptar, so bror skal strida mot bror og ven mot ven, by mot by og rike mot rike.

³Og vitet åt egyptarane skal kverva or hjarta deira, og eg vil gjera deira råd til inkjes; dei skal søkja til avgudane og trollmennene og daudingmanarane og spåmennene sine.

⁴Eg skal gjeva egyptarane i hendene på ein hard herre, og ein streng konge skal råda yver dei, segjer Herren, Israels Gud, allhers Gud.

⁵Og vatnet i havet kverv, og elvi grynnest og turkast ut. /[47]

⁶Elvane tevjar, kanalane minkar og turkast ut, røyr og sev visnar.

⁷Engjane frammed elvi, på elvebakken, og alt åkerland langs elvi turkast upp, fyk burt og kverv.

⁸Fiskarane klagar, og alle dei som kastar krok i elvi, syrgjer, og dei som set garn i vatnet, stend modlause.

⁹Dei som yrkjer med hekla lin, vert til skammar, og dei som vev fint kvitt ty.

¹⁰Landsens grunnpilarar er nedbrotne; alle dei som arbeidar for løn, er hugsjuke.

¹¹Berre dårar er hovdingane i Soan; dei visaste millom rådgjevarane åt Farao gjev fåvise råd. Korleis kann de då segja til Farao: Eg er ætta frå vismenner, frå kongane i gamletidi?

¹²Kvar er då vismennene dine, at dei kann vitra deg um og skyna kva Herren, allhers Gud, hev etla seg til å gjera med Egyptarland?

¹³Nei, fyrstane i Soan hev vorte dårar, fyrstane i Nof hev vorte til narr, og ættehovdingane hev ført Egyptarland på villstig.

¹⁴Herren hev rent ut ei svimringsånd i dei, so dei hev ført Egyptarland vilt i alle tiltak, liksom ein drukken mann ragar um i spyet sitt.

¹⁵Egyptarland skal ikkje hava framgang med noko av sine tiltak, anten det so er hovud eller hale, palmegrein eller sev som tek seg det fyre.

¹⁶I den tidi skal Egyptarland vera som kvinnor, det skal bivra og reddast for den lyfte handi åt Herren, allhers Gud, som han svingar imot det.

¹⁷Og Judalandet vert ei redsla for egyptarane; so ofte nokon nemner det for dei, skal dei skjelva for den rådgjerd Herren, allhers Gud, tek imot det.

¹⁸I den tidi skal det vera fem byar i Egyptarlandet som talar Kana'ans tungemål og sver Herren, allhers Gud, truskap; ein av dei skal heita Ir-Haheres. /[48]

¹⁹I den tidi skal det vera eit altar for Herren midt i Egyptarlandet, og ein minnestein for Herren ved landskilet.

²⁰Det skal vera til eit merke og eit vitne i Egyptarlandet for Herren, allhers Gud; når dei ropar til Herren for trælkarane skuld, skal han senda dei ein frelsar og stridsmann og berga dei.

²¹Og Herren skal gjera seg kjend for Egyptarland, og egyptarane skal kjenna Herren i den tidi, og dei skal bera fram slaktoffer og matoffer og gjera lovnader til Herren og halda dei.

²²Herren skal slå Egyptarland, slå, men og lækja, og når dei vender um til Herren, skal han bønhøyra dei og lækja dei.

²³I den tidi skal det vera ein brøytt veg frå Egyptarland til Assyria, og assyrarane skal koma til Egyptarland, og egyptarane til Assyria, og egyptarane skal tena Herren saman med assyrarane.

²⁴I den tidi skal Israel vera tridjemann i sambandet med Egyptarland og Assyria, ei velsigning midt på jordi,

²⁵for di Herren, allhers Gud, hev signa det og sagt: Signa vere Egyptarland, mitt folk, og Assyria, verket av mine hender, og Israel, min arv!