Read nynorsk 1938 Jesaja 21 Bible Online

Jesaja 21 - nynorsk 1938 bible

Jesaja 21

¹Framsegn um Havøydemarki. Som framfarande stormar i sudlandet kjem det frå øydemarki, frå det øgjelege landet. /[52]

²Ei hard syn er meg kunngjord: Ransmannen ranar, og herjaren herjar. Drag upp, du Elam! Treng på, du Media! Kvar ein sukk gjer eg ende på. /[53]

³Difor er mine lender fulle av verk, eg hev fenge rider liksom ei kvinna som skal føda. Eg vrid meg so eg ikkje kann høyra, eg er forfærd so eg ikkje kann sjå.

⁴Hugen min er forvildra, redsla hev teke meg. Kvelden, som eg stunda etter, hev han gjort til redsla for meg. /[54]

⁵Dei dukar bord, vakti vaker, dei et og drikk - upp, hovdingar, smyr skjoldane!

⁶For so sa Herren til meg: Gakk og set ut vaktmannen! Det han fer sjå, skal han melda.

⁷Og ser han ei skreid av ridarar, par um par, ei skreid av asen, ei skreid av kamelar, so skal han merka seg det, grant merka seg det.

⁸Då ropa han som ei løva: Herre, her stend eg på vakt so lang dagen er, og vert verande på min post natt etter natt;

⁹men sjå, no kjem her ei skreid av ridande menner, ridarar par um par! - Og han tok til ords og sa: Falle, falle hev Babel, og alle avgudsbileti deira hev han krasa og kasta til jordi. /[55]

¹⁰Å, du mitt knuste, mitt sundtreskte folk! Det eg hev høyrt av Herren, allhers Gud, Israels Gud, det hev eg kunngjort for dykk.

¹¹Framsegn um Duma. Til meg ropar dei frå Se'ir: Vaktmann, kva lid det med natti? /[56]

¹²Vaktmannen svarar: Morgonen kjem, men natti og. Vil de spyrja, so spør - kom att! /[57]

¹³Framsegn mot Arabia. I skogen i Arabia skal de natta, de ferdafylgje av dedanitar!

¹⁴Ut til dei tyrstande kjem dei med vatn; dei som bur i Temalandet, kjem imot dei rømande med brød;

¹⁵for dei flyr undan sverdet, undan det dregne sverdet og den spente bogen og undan den tunge ufreden.

¹⁶For so hev Herren sagt til meg: Um eit år, so som leigekaren reknar året, skal det vera ute med all herlegdomen åt Kedar.

¹⁷Og lite skal det då vera att av bogane åt kjempone i Kedar; for Herren, Israels Gud, hev tala.