Read nynorsk 1938 Jesaja 24 Bible Online

Jesaja 24 - nynorsk 1938 bible

Jesaja 24

¹Sjå, Herren tømer jordi og øyder henne; han brigder hennar skapnad og spreider dei som bur på henne.

²Då gjeng det presten som folket, herren som trælen, matmori som trælkvinna, seljaren som kjøparen, lånaren som utlånaren, okraren som skuldmannen hans.

³Tømd, ja uttømd skal jordi verta og plundra, ja plundra; for Herren hev tala dette.

⁴Jordi syrgjer og visnar burt, jordheimen sjuknar og visnar burt; storingane på jordi sjuknar burt.

⁵Og jordi er vanhelga under dei som bur der; for dei hev brote lovene, gjort imot bodet, brote den ævelege pakti.

⁶Difor øyder forbanning jordi, og bøta lyt dei som bur på henne; difor brenn jordbuane, so berre få folk vert leivde.

⁷Druvesafti tek skade, vintreet sjuknar burt; sukka lyt alle som fyrr var so hjarteglade.

⁸Det er slutt med gleda ved trummeljod og slutt med ståket av dei som jublar; det er slutt med gleda ved citarklangen.

⁹Syngjande tømer dei ikkje vinstaupet meir; beisk er den sterke drykken for dei som drikk.

¹⁰Nedbroten er den aude byen; stengt er kvart hus, so ingen kann ganga inn.

¹¹Dei jamrar seg på gatone yver vinen; all gleda er burte, landlyst er gaman or landet.

¹²Berre øyding er att i byen, og porten ligg krasa i røys.

¹³For so skal det ganga til millom folki på jordi som når oljebær vert nedslegne, som ved etterhaustingi, når det er slutt med vinbergingi.

¹⁴Dei, dei skal lyfte røysti si og ropa med fagnad; yver Herrens herlegdom fegnast dei frå havet. /

¹⁵Æra difor Herren, de som bur i Austerland, æra namnet åt Herren, Israels Gud, de som bur på havsens øyar! /[67]

¹⁶Frå ytste jaren åt jordi høyrer me lovsongar: Æra vere den Rettferdige! Men eg segjer: Eg gjeng til, eg gjeng til, usæl eg! Ransmenner ranar, ja, ransmenner ranar og herjar.

¹⁷Gru og grav og garn yver deg, du som bur på jordi!

¹⁸Og det skal ganga so at den som flyr for det gruelege bråket, skal falla i gravi, og den som kjem upp or gravi, skal verte fanga i garnet; for himmelslusone er opna, og grunnvollane åt jordi skjelv.

¹⁹Jordi brest og knest, jordi rivnar og klovnar, jordi skjek og skjelv.

²⁰Sjangla skal jordi som drukken mann og verta slengd att og fram som ei hengjekøy, misgjerdi hennar skal tyngja henne ned, og ho skal falla og ikkje reisa seg meir.

²¹I den tidi skal Herren heimsøkja himmelheren i høgdi og jordkongane nedpå jordi,

²²og dei skal sankast som fangar i hola og setjast fast i fangehuset, og langt um lenge skal dei få si straff.

²³Og månen skal blygjast og soli skjemmast; for Herren, allhers Gud, råder på Sionfjellet og i Jerusalem, og framfor augo på hans styresmenner er det herlegdom.