Read nynorsk 1938 Jesaja 27 Bible Online

Jesaja 27 - nynorsk 1938 bible

Jesaja 27

¹I den tidi skal Herren med sverdet sitt, det harde og store og sterke, heimsøkja Leviatan, den flogsnare draken, og Leviatan, den krøkjande draken, og han skal drepa ubeistet som ligg i havet. /[70][71]

²I den tidi [skal de kveda]: Det finst ein yndeleg vingard; syng um han!

³Eg, Herren, er vaktaren hans, kvar augneblink vatnar eg han; eg vaktar han dag og natt, so ingen skal heimsøkja han.

⁴Vreide hev eg ikkje mot han. Hadde eg tornar og tistlar mot meg i strid, då skulde eg rjuka på dei og brenna dei upp alle i hop -

⁵utan so dei vilde søkja vern hjå meg, gjera fred med meg, ja gjera fred med meg.

⁶I komande dagar skal Jakob røta seg, Israel bløma og få renningar, og dei skal fylla jordheimen med frukt.

⁷Hev vel Herren slege Israel so hardt som han slo den som slo han? Eller vart han drepen liksom fiendane hans vart drepne?

⁸Med måte refste du folket då du jaga det frå deg. Herren dreiv det burt med sitt harde ver den dagen austanvinden bles.

⁹Difor vert og misgjerdi åt Jakobs utsona, og det at syndi hans vert burtteki, gjev fullmogi frukt, når alle altarsteinane vert krasa som kalksteinar, og Astarte-bileti og solstolpane ikkje reiser seg meir.

¹⁰For den faste byen ligg i øyde, ein folketom bustad, aud som øydemarki. Kalvar beiter der og hev der si lega og et av kvistene;

¹¹når greinene hev vorte turre, bryt dei av, kvinnfolki kjem og nører upp eld med dei. For dette er ikkje noko vitugt folk; difor miskunnar deira skapar dei ikkje, og han som laga dei, er dei ikkje nådig.

¹²Og det skal henda i den tidi at Herren skal halda ei frukthausting alt frå Storelvi til Egyptarlands-bekken, og de, Israels born, skal verte sanka, ein for ein. /[72]

¹³Og det skal henda i den tidi at dei skal blåsa i ein stor lur, og då skal dei koma dei burtkomne i Assurs land og dei burtdrivne i Egyptarlandet, og dei skal tilbeda Herren på det heilage fjellet i Jerusalem.