Read nynorsk 1938 Jesaja 32 Bible Online

Jesaja 32 - nynorsk 1938 bible

Jesaja 32

¹Sjå, med rettferd skal kongen råda, og hovdingane skal styra etter rett,

²og kvar ein av dei skal vera som eit skyle for veret og ei livd mot sturtregn, som bekker i øydemarki, som skuggen av eit veldigt fjell i eit uppturka land.

³Då skal augo åt dei som ser, ikkje vera blinde, og øyro åt dei som høyrer, skal vera grannhøyrde,

⁴hjarto åt dei tankelause skal evla skyna; og tunga åt dei stame skal hava lett for å tala klårt.

⁵Dåren skal ein ikkje meir kalla gjæv, og den svikfulle skal ein ikkje kalla hugstor.

⁶For dåren talar dårskap, og hjarta hans finn på vondt; so gjer han vanheilag gjerd og talar forvende ting um Herren, han let den hungrige svelta og let den tyrste vanta drikka.

⁷Og våpni åt den svikfulle er vonde; han tenkjer ut meinråder til å føra dei spaklyndte i ulukka med falske ord, og det når den fatige talar det som rett er.

⁸Men gjævningen hev gjæve tankar, og han stend fast ved det som gjævt er.

⁹De sorglause kvinnor, statt upp og høyr det eg segjer! De trygge døtter, vend øyra dykkar til min tale!

¹⁰Um år og dag skal de skjelva, de trygge! For det er slutt med all vinberging, fruktonni kjem ikkje.

¹¹Vert forfærde, de sorglause! Skjelv, de trygge! Klæd dykk nakne og sveip sekk um dykkar lender!

¹²Dei slær seg for bringa og klagar yver dei fagre marker, yver det fruktrike vintreet.

¹³På åkrane åt mitt folk, skyt tornar og tistlar upp, ja yver alle gledehus i den jublande byen.

¹⁴For slottet er tomt, mugen i byen er burte; haug og vakttårn hev vorte til holor for ævelege tider, til frygd for villasen, til beite for bølingar - /[87]

¹⁵til dess Anden vert utrend yver oss frå det høge, og øydemarki vert til grøderikt land, og grøderikt land vert rekna som skog.

¹⁶Og rett skal bu i øydemarki, og rettferd skal hava sin heim på det grøderike landet.

¹⁷Og rettferds verk skal vera fred, og rettferds frukt skal vera ro og tryggleik til æveleg tid.

¹⁸Og folket mitt skal bu i freds bustad og i tryggleiks tjeld og på sorgfrie kvilestader.

¹⁹Men det skal hagla når skogen fell, og djupt skal byen kuast ned. /[88]

²⁰Sæle er de som sår attmed alle vatn, som slepper uksen og asnet på frifot!