Read nynorsk 1938 Jesaja 61 Bible Online

Jesaja 61 - nynorsk 1938 bible

Jesaja 61

¹Herrens, Israels Guds Ande er yver meg; av di Herren hev salva meg til å bera fagnadbod til dei audmjuke, han hev sendt meg til å binda um dei hugbrotne, til å ropa ut fridom for fangar og utløysing for dei bundne,

²til å ropa ut eit nåde-år frå Herren og ein hemnedag frå vår Gud, til å trøysta alle som syrgjer,

³til å gjeva dei syrgjande i Sion hovudprydnad i staden for oska, gledeolje i staden for sorg, lovsongs-klæde for vanmoda ånd, og dei skal heita rettferds terebintor, Herrens plantning til æra for han.

⁴Dei skal byggja upp att eldgamle grushaugar, reisa upp att ruinar frå forfederne; dei skal nya upp att nedbrotne byar, det som hev lege i øyde frå ætt til ætt.

⁵Framande skal standa og gjæta smalen dykkar, utlendingar dyrka åt dykk både åker og vingard.

⁶Men de skal heita Herrens prestar, tenarar åt vår Gud skal dei kalla dykk; folke-eiga skal de njota, og deira herlegdom skal de få.

⁷For dykkar skam fær de dobbelt att, og dei som leid skjemsla, skal prisa sin lut; difor fær dei dobbel lut i sitt land, æveleg gleda skal dei få;

⁸for eg, Herren, elskar rett og hatar urett ran, og trufast vil eg gjeva dei løni deira og gjera ei æveleg pakt med dei.

⁹Namngjeten vert deira ætt millom folki, og avkjømet deira millom folkeslagi; alle som ser dei, skal sanna at dei er ei ætt som Herren hev signa.

¹⁰Eg vil gleda meg storleg i Herren, sjeli mi skal fegnast i min Gud; for han hev kledt meg i frelse-klæde, i rettferds-kåpa hev han sveipt meg, liksom brudgomen, som pryder seg med prestehuva, og liksom bruri som tek på seg sin prydnad.

¹¹For som jordi let sin grode renna, og hagen let sitt sæde veksa, so skal Herren, Israels Gud, lata rettferd og lovsong renna for alle folks åsyn.