Read nynorsk 1938 Tredje Mosebok 1 Bible Online

Tredje Mosebok 1 - nynorsk 1938 bible

Tredje Mosebok 1

¹Og Herren ropa på Moses og tala til han or møtetjeldet og sa:

²Tala til Israels-borni og seg til dei: Når nokon av dykk vil koma til Herren med ei offergåva av buskapen, so kann de taka offeret dykkar anten av storfeet eller av småfeet.

³Er det eit brennoffer han vil gjeva, og han tek det av storfeet, so skal det vera ein ukse som ikkje hev lyte. Til døri åt møtetjeldet skal han koma med gåva si, so han vert velsedd for Herrens åsyn,

⁴og han skal leggja handi på hovudet åt offerdyret; då skal det tekkjast Herren og vera til soning for han.

⁵So skal han slakta uksen for Herrens åsyn, og Arons-sønene, prestane, skal bera fram blodet og skvetta det rundt ikring på altaret som stend framanfor døri åt møtetjeldet.

⁶Og so skal han flå offerdyret og lema det sund;

⁷og sønene åt Aron, presten, skal kveikja upp eld på altaret og leggja ved på elden.

⁸Sidan skal Arons-sønene, prestane, leggja kjøtet og hovudet og feittet uppå veden som er lagd på altarelden.

⁹Innvolen og føtene skal tvåast i vatn, og so skal presten brenna alt saman på altaret; då er det eit brennoffer, eit eldoffer som gjev god ange for Herren.

¹⁰Tek han brennofferet sitt av småfeet, av sauene eller geitene, so skal det vera ein lytelaus ver eller bukk.

¹¹Den skal han slakta på nordsida åt altaret for Herrens åsyn, og Arons-sønene, prestane, skal skvetta blodet rundt ikring på altaret.

¹²So skal han luta upp offerdyret og lata hovudet og feittet fylgja med, og presten skal leggja lutene uppå veden som er lagd på altarelden.

¹³Innvolen og føtene skal dei två i vatn, og so skal presten bera fram alt saman og brenna det på altaret; då er det er eit brennoffer, eit eldoffer som gjev god ange for Herren.

¹⁴Er det ein fugl han vil taka til brennoffer åt Herren, so skal offergåva han kjem med, vera ei turtelduva eller ein duveunge.

¹⁵Presten skal bera fuglen fram åt altaret og vrida hovudet av han og brenna det på altaret; og blodet skal kreistast ut mot altarveggen.

¹⁶So skal han taka ut krelen med goret som er i, og kasta det attmed altaret, på austsida, der oska er,

¹⁷og so flekkja fuglen innmed vengene, men ikkje riva dei av. Sidan skal presten brenna han på altaret, på veden som er lagd på elden; då er det eit brennoffer, eit eldoffer som gjev god ange for Herren.