Read nynorsk 1938 Tredje Mosebok 11 Bible Online

Tredje Mosebok 11 - nynorsk 1938 bible

Tredje Mosebok 11

¹Og Herren tala til Moses og Aron og sa til dei:

²Tala til Israels-borni og seg: Høyr no kva det er for nokre de må eta av alle dei firføtte dyri som lever på jordi:

³Alle firføtte dyr som hev klauver og jortar, dei kann de eta.

⁴Det er berre desse de ikkje må eta av dei som jortar og av dei som hev klauver: kamelen, for han jortar, men hev ikkje klauver; han skal vera urein for dykk,

⁵og bergtassen, for han jortar, men hev ingi klauver; han skal vera urein for dykk,

⁶og haren, for um han jortar, so hev han ikkje klauver han heller; han skal vera urein for dykk,

⁷og svinet, for det hev klauver, men det jortar ikkje; det skal vera ureint for dykk.

⁸Kjøtet deira må de ikkje eta, og er dei daude, so må de ikkje røyva dei; dei skal vera ureine for dykk.

⁹Høyr so kva de må eta av det som er i vatnet: Alt som er i vatnet - i havet og elvane - og hev uggar og reist, kann de eta.

¹⁰Men slikt som ikkje hev uggar og reist av alt det som finst i hav eller elvar, av alt det som yrer i vatnet, alle kvikjende som held til der, det skal vera ein styggedom for dykk.

¹¹Ein styggedom skal dei vera for dykk; kjøtet deira må de ikkje eta, og er dei daude, so skal de styggjast ved kroppane deira.

¹²Alt i vatnet som ikkje hev uggar og reist, skal vera ein styggedom for dykk.

¹³Høyr no og kva det er for fuglar de skal hava stygg til og ikkje må eta, av di dei er ein styggedom: Ørnen og sjøørnen og fiskeørnen

¹⁴og glenta og heile falkeætti

¹⁵og alle fuglar av ramneætti

¹⁶og strussen og gauken og måsen og alle haukeslag

¹⁷og kattula og kavfuglen og stunulven

¹⁸og kveldknarren og pelikanen og gribben

¹⁹og storken, og hegren med alle andre fuglar av same ætti, og herfuglen og skinnvengja.

²⁰Alt krek som hev venger og krabbar på marki, skal vera ein styggedom for dykk.

²¹Av alt sovore krek må de ikkje eta anna enn det som ovanfor bakføtene hev legger til å hoppa på marki med.

²²Av det kann de eta dei slagi som dei kallar arbe og solam og hargol og hagab. /[5]

²³Men alt anna krek som hev venger og krabbar på marki, skal vera ein styggedom for dykk.

²⁴No skal eg segja dykk kva det er for dyr de vert ureine av - den som kjem nær kroppen deira etter dei er daude, skal vera urein alt til kvelds,

²⁵og den som hev bore på slik ein daud kropp, lyt två klædi sine og vera urein alt til kvelds -:

²⁶Alle firføtte dyr som hev høver og ikkje klauver, og som ikkje jortar, skal vera ureine for dykk; den som kjem nær dei, vert urein.

²⁷Og alle firføtte dyr som gjeng på labbar, skal vera ureine for dykk; den som kjem nær dei når dei er daude, skal vera urein alt til kvelds,

²⁸og den som hev bore på slikt eit daudt dyr, lyt två klædi sine og vera urein alt til kvelds. Ureine skal dei vera for dykk.

²⁹Av alle smådyr som røyver seg på jordi, er det desse som skal vera dei ureinaste for dykk: moldvarpen og musi og alle fjorføtleslag,

³⁰og bustyvelen og vonden og padda og snigelen og kameleonen. /[6]

³¹Dei skal de halda for dei ureinaste av alle smådyr; den som kjem nær dei når dei er daude, skal vera urein alt til kvelds.

³²Og alt det som slike dyr dett ned på når dei daudar, vert ureint, både trekoppar og klæde og skinn og sekker og kva det elles er som vert nytta i huset; det skal leggjast i vatn og vera ureint alt til kvelds; sidan er det reint.

³³Dett eit av dyri ned i ein leirkopp, so vert alt det som er i koppen ureint, og koppen sjølv skal slåast sund.

³⁴All mat som folk et, og som vert tillaga med vatn, og alt drikka som folk drikk, vert ureint, kva kjerald det er i.

³⁵Alt det som slik ein daud kropp dett ned i, vert ureint; anten det er omn eller gryta, so skal dei brjotast sund; dei er ureine og skal vera ureine for dykk.

³⁶Berre kjeldor og brunnar som det renn vatn åt, skal vera like reine; men den som kjem nær den daude kroppen som ligg der, vert urein.

³⁷Dett dyret ned i korn som skal vera til såfrø, so er kornet like reint,

³⁸men hev dei havt vatn på det, og det so dett slikt eit daudt dyr ned i, so skal kornet vera ureint for dykk.

³⁹Daudar noko av dei firføtte dyri som skal vera til føda for dykk, so skal den som kjem nær skrotten deira, vera urein alt til kvelds,

⁴⁰den som hev ete av kjøtet deira, lyt två klædi sine og vera urein alt til kvelds, og den som hev bore på den daude skrotten, lyt og två klædi sine og vera urein alt til kvelds.

⁴¹Alt kreket som krelar på marki, skal vera ein styggedom og må ikkje etast.

⁴²Korkje det som skrid på buken, eller det som gjeng på fire eller fleire føter, må de eta; det skal vera ein styggedom.

⁴³Gjer dykk ikkje sjølve til eit stygge med noko av det krelande kreket, og sulka dykk ikkje med det, so de vert ureine!

⁴⁴For eg er Herren dykkar Gud, og de skal helga dykk og vera heilage; for eg er heilag; de skal ikkje gjera dykk sjølve ureine med noko av det kreket som krabbar på marki.

⁴⁵For eg er Herren, som førde dykk ut or Egyptarlandet og vil vera dykkar Gud, og de skal vera heilage; for eg er heilag.

⁴⁶Dette er lovi um dei firføtte dyri og fuglane og alt det levande som leikar i vatnet, og alle dei kvikjende som yrer på jordi,

⁴⁷so de kann skilja det reine frå det ureine, og dei dyri som kann etast, frå det som ikkje må etast.