Read nynorsk 1938 Tredje Mosebok 16 Bible Online

Tredje Mosebok 16 - nynorsk 1938 bible

Tredje Mosebok 16

¹Då dei tvo Arons-sønene var slokna, dei som laut døy den gongen dei gjekk fram for Herrens åsyn, då tala Herren til Moses

²og sa til han: Seg til Aron, bror din, at han ikkje må ganga inn i heilagdomen innanfor forhenget og fram åt nådestolen som er yver kista, kva tid han vil; då kunde han missa livet; for eg vil syna meg i skyi uppyver nådestolen.

³Soleis lyt Aron vera budd når han skal ganga inn i heilagdomen: Han skal hava med seg ein ung ukse til syndoffer og ein ver til brennoffer.

⁴Og han skal klæda seg i ein heilag underkjole av lin og hava ei linbrok på seg næst kroppen og binda eit linbelte kring livet og sveipa eit linplagg kring hovudet; dette er dei heilage klædi, og fyrr han tek dei på seg, skal han lauga lekamen sin i vatn.

⁵Og av Israels-lyden skal han få tvo geitebukkar til syndoffer og ein ver til brennoffer.

⁶So skal Aron leida fram syndofferuksen sin og gjera soning for seg og huset sitt.

⁷Og han skal taka båe bukkane og leida dei fram for Herrens åsyn, til møtetjelddøri.

⁸Og Aron skal kasta lut um bukkane, ein lut for Herren og ein for Asasel. /[8]

⁹Og den bukken som fell på Herrens lut, skal Aron leida fram og ofra til syndoffer.

¹⁰Men den som fell på Asasels lut, skal leidast levande fram for Herrens åsyn, so dei kann gjera soning med han, og so skal han sendast ut i øydemarki til Asasel.

¹¹Når Aron leider fram syndofferuksen sin og gjer soning for seg og huset sitt, so skal han fyrst slakta uksen,

¹²og so skal han fylla glodfatet sitt med glør frå altaret for Herrens åsyn og taka tvo nevar med finstøytt, angande røykjelse og bera innanfor forhenget,

¹³og han skal leggja røykjelsen på elden for Herrens åsyn, so røykjelseskyi gøymer nådestolen, som er yver vitnemålet; elles lyt han døy.

¹⁴So skal han taka noko av ukseblodet og skvetta med fingeren på framsida av nådestolen, og framfor nådestolen skal han skvetta med fingeren av blodet sju gonger.

¹⁵So skal han slakta den bukken som er etla til syndoffer for folket, og bera blodet innanfor forhenget og gjera med det som han gjorde med blodet av uksen: skvetta det på nådestolen og framanfor nådestolen.

¹⁶Soleis skal han gjera soning for heilagdomen og reinska han for ureinskapen åt Israels-borni og for alle broti deira, alt det dei hev synda i, og det same skal han gjera med heile møtetjeldet, som er reist millom dei midt i ureinskapen deira.

¹⁷Og det må ikkje finnast noko menneske i møtetjeldet frå Aron gjeng inn og skal gjera soning i heilagdomen, og til han kjem ut att. Soleis skal han gjera soning for seg og for huset sitt og for heile Israels-lyden.

¹⁸So skal han ganga ut til altaret som er reist for Herrens åsyn, og gjera soning for det; han skal taka noko av ukseblodet og noko av bukkeblodet og strjuka rundt ikring på altarhorni

¹⁹og skvetta med fingeren av blodet på altaret sju gonger og reinsa det for ureinskapen åt Israels-borni og helga det.

²⁰Når Aron hev fullført soningi for heilagdomen og møtetjeldet og altaret, so skal han leida fram den levande bukken

²¹og leggja hendene på hovudet hans og skrifta uppyver han alle dei misgjerningar og brot som Israels-borni hev gjort so ofte dei hev synda, og leggja dei på hovudet åt bukken og so senda han ut i øydemarki med ein mann som stend reidug.

²²Og bukken skal bera alle misgjerningane deira med seg ut i villmarki, og mannen skal sleppa bukken der i øydemarki.

²³Sidan skal Aron ganga inn i møtetjeldet og taka av seg linklædi som han hadde på seg då han gjekk inn i heilagdomen, og gøyma dei der.

²⁴So skal han lauga lekamen sin i vatn på ein heilag stad og klæda seg i den vanlege bunaden sin og so ganga ut att og ofra brennofferet sitt og brennofferet for folket og gjera soning for seg og for folket.

²⁵Og feittet av syndofferet skal han brenna på altaret.

²⁶Den som leidde bukken ut til Asasel, lyt två klædi sine og lauga lekamen sin i vatn; då fyrst kann han få koma inn i lægret.

²⁷Uksen og bukken som vart slakta til syndoffer, og som dei tok blodet av og bar inn i heilagdomen til å gjera soning med, skal dei føra ut or lægret og brenna både skinni og kjøtet og møki.

²⁸Den som brenner det, lyt två klædi sine og lauga lekamen sin i vatn; sidan kann han koma inn i lægret.

²⁹Og dette skal vera ei æveleg lov for dykk: Den tiande dagen i den sjuande månaden skal de fasta og ikkje gjera noko slag arbeid, korkje den som er fødd og boren i landet, eller den framande som held til hjå dykk.

³⁰For den dagen skal dei gjera soning for dykk og reinsa dykk for alle syndene dykkar, so de vert reine for Herren.

³¹Ein høgheilag sabbat skal det vera for dykk, og då skal de fasta; det skal vera ei æveleg lov.

³²Den som skal standa for soningi, er presten, han som hev vorte salva og vigd til å gjera prestetenesta etter far sin. Han skal klæda seg i linklædi, dei heilage klædi,

³³og gjera soning for det høgheilage romet og møtetjeldet og altaret; og prestane og heila ålmugen skal han og gjera soning for.

³⁴Det skal vera ei æveleg lov for dykk at dei ein gong um året skal gjera soning for Israels-borni og reinsa dei for alle syndene deira. Og Aron gjorde som Herren hadde sagt Moses fyre.