Read nynorsk 1938 Tredje Mosebok 17 Bible Online

Tredje Mosebok 17 - nynorsk 1938 bible

Tredje Mosebok 17

¹Og Herren tala til Moses og sa:

²Tala til Aron og sønene hans og til alle Israels-borni og seg til dei: Høyr no kva Herren vil de skal gjera:

³Er det nokon mann av Israels-ætti som slaktar ein ukse eller ein sau eller ei geit anten i eller utanfor lægret

⁴og ikkje leider dei fram til møtetjelddøri og ofrar Herren ei gåva framfor Herrens tabernakel, so skal den mannen reknast jamgod med ein dråpsmann; han hev rent ut blod og skal rydjast ut or folket sitt.

⁵Difor skal Israels-borni koma til Herren med slaktedyri sine som dei er vane å slakta ute på marki, og leida dei fram åt møtetjelddøri, til presten, og ofra dei til takkoffer åt Herren.

⁶Og presten skal skvetta blodet på Herrens altar som stend framanfor møtetjelddøri, og brenna feittet til godange for Herren.

⁷Og dei skal ikkje lenger gjeva slaktofferi sine til dei vonde åndene som dei flyg etter. Dette skal vera ei æveleg lov for dei, frå ætt til ætt.

⁸Og dette skal du segja til dei: Dersom nokon av Israels-ætti eller av dei framande som bur millom dei, ber fram eit brennoffer eller slaktoffer

⁹og ikkje kjem til møtetjelddøri med det og ofrar det til Herren, so skal den mannen rydjast ut or folket sitt.

¹⁰Og dersom nokon av Israels-ætti eller av dei framande som bur millom dei, et aldri so lite blod, so skal eg kvessa augo imot den mannen og rydja han ut or folket hans.

¹¹For sjeli åt kjøtet er i blodet, og eg hev gjeve dykk lov til å hava blod på altaret til soning for sjelene dykkar. For blodet det sonar av di sjeli er i det.

¹²Difor hev eg sagt til Israels-borni: Ingen av dykk må eta blod; dei framande som bur hjå dykk, må heller ikkje gjera det.

¹³Og når nokon av Israels-borni eller av dei framande som bur millom dei, veider eit villdyr eller ein fugl som dei lov til å eta, so skal han lata blodet renna ut og hava jord yver det.

¹⁴For blodet er i sjeli i alt kjøt, av di sjeli er i det; difor sa eg til Israels-borni: De må ikkje eta blodet av noko kjøt, for blodet er sjeli i alt kjøt; kven som et det, han skal rydjast ut.

¹⁵Hev nokon mann, anten han er fødd i landet eller han er framand, ete av eit dyr som er sjølvdaudt eller ihelrive, so skal han två klædi sine og lauga seg og vera urein alt til kvelds; sidan er han rein.

¹⁶Tvær han ikkje klædi sine og ikkje laugar lekamen sin, so gjer han ei synd som han lyt lida for.