Read nynorsk 1938 Tredje Mosebok 18 Bible Online

Tredje Mosebok 18 - nynorsk 1938 bible

Tredje Mosebok 18

¹Og Herren tala til Moses og sa:

²Tala til Israels-borni og seg til dei: Eg er Herren dykkar Gud.

³De skal ikkje fara åt som dei gjer i Egyptarlandet, der de fyrr budde, eller i Kana'anslandet, som eg fører dykk til, og ikkje fylgja skikkane deira.

⁴Mine bod skal de lyda, og mine lover skal de halda dykk etter og fylgja; eg er Herren dykkar Gud.

⁵De skal halda lovene og bodi mine; for det mennesket som held dei, skal leva ved dei; eg er Herren.

⁶Ingen av dykk må koma innåt nokor nærskyld kvinna og søkja seng med henne; eg er Herren.

⁷Du skal ikkje skjemma lega åt far din og mor di. Ho er mor di; du skal ikkje søkja seng med henne.

⁸Du skal ikkje søkja seng med stykmor di; ho er kona åt far din.

⁹Du skal ikkje søkja seng med syster di; som hev same far eller same mor som du; anten ho er fødd i eller utanfor huset, so skal du ikkje søkja seng med henne.

¹⁰Du skal ikkje søkja seng med sonedotter eller dotterdotter di; for det er ditt eige avkjøme.

¹¹Du skal ikkje søkja seng med dotter åt stykmor di; ho er dotter åt far din, og ho er syster di.

¹²Du skal ikkje søkja seng med farsyster di; det er same blodet som far din.

¹³Du skal ikkje søkja seng med morsyster di; det er same blodet som mor di.

¹⁴Du skal ikkje skjemma lega åt farbror din og koma kona hans for nær; for ho er farsyster di.

¹⁵Du skal ikkje søkja seng med verdotter di. Ho er kona åt son din; du skal ikkje søkja seng med henne.

¹⁶Du skal ikkje søkja seng med brorkona di - ikkje skjemma lega åt bror din.

¹⁷Hev du havt samlega med ei kvinna, so skal du ikkje søkja seng med dotter hennar; heller ikkje skal du ganga i seng med sonedotter eller dotterdotter hennar. Det er skjemdarferd; for dei er same folket.

¹⁸Du skal ikkje gifta deg med versyster di og søkja seng med henne medan kona di lever; for då set du hat millom dei.

¹⁹Du skal ikkje koma innåt nokor kvinna og søkja seng med henne medan ho hev månadssjuken sin og er urein.

²⁰Du skal ikkje liggja hjå kona åt næsten din og på den måten gjera deg urein.

²¹Du skal ikkje gjeva noko av borni dine frå deg til eldoffer åt Molok; du skal ikkje vanhelga namnet åt din Gud; eg er Herren. /[9]

²²Du skal ikkje liggja hjå ein kar som ein ligg hjå ei kvinna; det er ein styggedom.

²³Med dyr må du aldri blanda deg; for då vert du urein. Og heller ikkje må ei kvinna gjeva seg i lag med dyr og para seg med dei; det er skjemdarferd.

²⁴Gjer dykk ikkje ureine med sovori åtferd! For slikt var det dei gjorde seg ureine med dei heidningane som eg driv ut for augo dykkar;

²⁵då vart landet ureint, og eg heimsøkjer det for broti deira, so landet spyr ut dei som bur der.

²⁶Men de skal halda lovene og bodi mine og ikkje gjera noko av desse skjemdarverki, korkje den som er fødd i landet, eller den framande som bur millom dykk;

²⁷for alle desse skjemdarverki hev dei gjort dei som hev butt i landet fyre dykk, so landet vart ureint.

²⁸Elles kjem landet til å spy dykk ut, for di de gjer det ureint, liksom det spyr ut det folket som hev vore der fyre dykk.

²⁹For alle dei som gjer slike skjemdarverk, dei skal rydjast ut or folket sitt - kvar og ein som gjer noko sovore.

³⁰So haldt då dei bodi eg hev gjeve dykk, og tak ikkje etter dei fæle skikkane som dei hadde, dei som var fyre dykk; for med det gjer de dykk ureine: Eg er Herren dykkar Gud.