Read nynorsk 1938 Tredje Mosebok 21 Bible Online

Tredje Mosebok 21 - nynorsk 1938 bible

Tredje Mosebok 21

¹Og Herren sa til Moses: Tala til prestane, Arons-sønene, og seg til dei: Ein prest må ikkje gjera seg urein for landsmennene sine med å røra noko lik,

²minder det er ein av hans næmaste skyldfolk, anten mor eller far eller son eller dotter eller bror

³eller ei syster som var møy og endå høyrde til ætti, med di ho ikkje var burtgift; henne kann han koma nær um ho ligg lik.

⁴Han må ikkje gjera seg urein i sitt ektestand, so han vanhelgar seg millom landsfolket sitt.

⁵Prestane må ikkje raka seg snaude nokon stad på hovudet og ikkje stytta skjegget sitt og ikkje skjera seg i holdet.

⁶Heilage skal dei vera for sin Gud, dei må ikkje vanhelga namnet hans; for det er dei som ber fram eldofferi åt Herren, maten åt deira Gud; difor skal dei vera heilage.

⁷Ingen av dei må gifta seg med ei skjøkja eller ei kvinna som er utskjemd, heller ikkje med ei kvinna som mannen hev skilt seg frå; for heilag er presten for sin Gud.

⁸Og du skal halda han heilag; for det er han som ber fram maten åt din Gud; heilag skal han vera deg; for eg er heilag, eg, Herren, som helgar dykk.

⁹Og dersom ei prestedotter vanhelgar seg med skjøkjelivnad, so vanhelgar ho far sin; ho skal brennast på bål.

¹⁰Den presten som er yver alle brørne sine, han som hev fenge salvingsoljen på hovudet sitt og er vigd til øvsteprest og hev klædt seg i den heilage bunaden, han må ikkje raka seg på hovudet og ikkje riva sund klædi sine.

¹¹Han må ikkje ganga inn til noko lik; ikkje far eller mor di heller må han koma nær etter dei hev andast; for då vert han urein.

¹²Han må ikkje ganga ut or det heilage huset, so han vanhelgar heilagdomen åt sin Gud; for vigsla av Guds salvingsolje er yver han; eg er Herren.

¹³Han skal taka ei rein møy til kona.

¹⁴Ei enkja, eller ei kvinna som er fråskild eller utskjemd, eller ei skjøkja, slik ei må han aldri gifta seg med. Berre ei møy av folket sitt må han taka til kona.

¹⁵Han må ikkje vanhelga ætti si millom folket; for eg er Herren, som helgar han!

¹⁶Og Herren tala til Moses og sa:

¹⁷Tala til Aron og seg: Er det nokon av ætti di, no eller i komande tider, som hev eit lyte, so må han ikkje ganga innåt og bera fram maten åt sin Gud.

¹⁸Ingen som det er noko lyte på, må ganga innåt, ingen som er blind eller halt eller hev noko lyte i andletet eller ein lem som er for stor

¹⁹eller ein broten fot eller arm,

²⁰eller som er krylryggja eller dverg, eller som hev ein kvit flekk på augnesteinen eller hev skabb eller noko anna utbrot eller er klakka.

²¹Ingen etterkomar av Aron, presten, som hev noko lyte, må ganga innåt og bera fram eldofferi åt Herren; det er lyte på han, han må ikkje ganga innåt og bera fram maten åt sin Gud.

²²Han må nok eta av rettene åt sin Gud, både dei høgheilage og dei heilage;

²³men etter di det er lyte på han, må han ikkje ganga fram til forhenget og ikkje koma innåt altaret; han må ikkje vanhelga heilagdomane mine; for eg er Herren, som helgar dei.

²⁴Og Moses sa dette til Aron og sønene hans og til alle Israels-borni.