Read nynorsk 1938 Tredje Mosebok 24 Bible Online

Tredje Mosebok 24 - nynorsk 1938 bible

Tredje Mosebok 24

¹Og Herren tala til Moses og sa:

²Seg til Israels-borni at dei skal koma med skir olje av sundstøytte oljebær til ljosestaken, so lampone kann setjast upp til kvar tid.

³Utanfor teppet som heng attfor vitnemålet i møtetjeldet, skal Aron stella lampone so dei kann lysa for Herrens åsyn frå kveld til morgon, stødt og stendigt; det skal vera ei æveleg lov for dykk, frå ætt til ætt. /[12]

⁴På den bjarte gullstaken skal han skipa lampone for Herrens åsyn seint og tidleg.

⁵So skal du taka fint mjøl og baka tolv kakebrød; i kvart brød skal det vera tvo tiandepartar av ein efa.

⁶Og dei skal du leggja i tvo rader, seks i kvar rad, på gullbordet for Herrens åsyn.

⁷Og på kvar rad skal du leggja rein røykjelse; det skal vera eit minningsoffer for brødi, eit eldoffer åt Herren.

⁸Kvar sabbatsdag skal han leggja brødi fram for Herrens åsyn, stødt og stendigt; det skal vera ei gåva frå Israels-borni - ei æveleg pakt.

⁹Og Aron og sønene hans skal få dei og eta dei på ein heilag stad; for dei er høgheilage og er hans lut av Herrens eldoffer - ein æveleg rett.

¹⁰Ein som var son til ei israelitisk kvinna, men hadde ein egyptar til far, gjekk ein gong ut millom Israels-borni, og han og ein av Israels-mennene kom i tretta med kvarandre i lægret.

¹¹Og son til den israelitiske kvinna - ho heitte Selomit Dibrisdotter, og var av Dans-ætti - tok til å spotta Herrens namn og banna det.

¹²Då førde dei han burt til Moses og sette han fast til dei kunde få saki avgjord med eit ord frå Herren.

¹³Og Herren tala til Moses og sa:

¹⁴Før spottaren ut or lægret, og alle dei som høyrde på det, skal leggja hendene på hovudet hans, og heile lyden skal steina han.

¹⁵Og til Israels-borni skal du segja: Den som bannar sin Gud, lyt lida for syndi si,

¹⁶og den som spottar Herrens namn, han skal lata livet; heile lyden skal steina han i hel; anten han er framand eller fødd og boren i landet, so skal han steinast, so sant han hev spotta Herrens namn.

¹⁷Slær nokon ein mann i hel, so skal han lata livet.

¹⁸Den som slær i hel eit krøter, skal gjeva like for det, liv for liv.

¹⁹Valdar nokon at næsten hans fær skade på lekamen, so skal dei gjera det same med han som han sjølv hev gjort:

²⁰brot for brot, auga for auga, tonn for tonn; det same meinet som han hev gjort ein annan, skal han sjølv få.

²¹Den som slær i hel eit krøter, skal gjeva lika for det; men den som slær i hel eit menneske, skal lata livet.

²²Det er same retten for dykk alle, for den framande likso vel som for den som er fødd og boren i landet; for eg er Herren dykkar Gud.

²³Og Moses kunngjorde dette for Israels-borni, og dei førde spottaren ut or lægret og steina han i hel: Israels-borni gjorde som Herren hadde sagt til Moses.