Read nynorsk 1938 Tredje Mosebok 3 Bible Online

Tredje Mosebok 3 - nynorsk 1938 bible

Tredje Mosebok 3

¹Vil nokon bera fram eit takkoffer, og han tek det av storfeet, so kann det offerdyret han leider fram for Herrens åsyn, vera anten ukse eller ku, men lytelaust skal det vera.

²Han skal leggja handi på hovudet åt offerdyret og slakta det innmed døri til møtetjeldet, og Arons-sønene, prestane, skal skvetta blodet rundt ikring på altaret.

³So skal han av takkofferet bera fram eit eldoffer åt Herren, og det skal vera netja og alt feittet som er på innvolen,

⁴og båe nyro med talgi som er på dei og rekk burtåt låri, og den store levreflaga - den skal han skjera utor i hop med nyro -

⁵og Arons-sønene skal brenna det på altaret saman med brennofferet som ligg på veden dei hev lagt på elden; det er eit eldoffer som gjev god ange for Herren.

⁶Er det av småfeet han tek det dyret som han vil bera fram for Herren til takkoffer, so kann det vera anten han eller ho, men det skal vera fritt for lyte.

⁷Vil han ofra ein sau, so skal han leida han fram for Herrens åsyn.

⁸Han skal leggja handi på hovudet åt offerdyret og slakta det framanfor møtetjeldet, og Arons-sønene skal skvetta blodet rundt ikring på altaret.

⁹So skal han av takkofferet bera fram eit eldoffer åt Herren, og det skal vera alt feittet som er på sauen: spælen heil og halden - den skal han skjera av tett innmed roti - og netja og alt feittet som er på innvolen,

¹⁰og båe nyro med talgi som er på dei og rekk burtåt låri, og den store levreflaga - den skal han skjera utor i hop med nyro -

¹¹og presten skal brenna det på altaret; det er eit eldoffermål for Herren.

¹²Er det ei geit han vil ofra, so skal han leida henne fram for Herrens åsyn.

¹³Han skal leggja handi på hovudet hennar og slakta henne framanfor møtetjeldet, og Arons-sønene skal skvetta blodet rundt ikring på altaret.

¹⁴So skal han av offeret sitt bera fram eit eldoffer åt Herren, og det skal vera netja og alt feittet som er på innvolen,

¹⁵og båe nyro med talgi som er på dei og rekk burtåt låri, og den store levreflaga - den skal han skjera utor i hop med nyro -

¹⁶og presten skal brenna det på altaret; det er eit eldoffermål som angar godt. Alt feitt høyrer Herren til.

¹⁷Ei æveleg lov skal det vera for dykk, frå ætt til ætt, kvar de so bur. Feitt og blod må de aldri eta.