Read nynorsk 1938 Tredje Mosebok 4 Bible Online

Tredje Mosebok 4 - nynorsk 1938 bible

Tredje Mosebok 4

¹Og Herren tala til Moses og sa:

²Tala til Israels-borni og seg: Når nokon uviljande syndar mot eit av Herrens bod og gjer noko som han hev forbode å gjera, so høyr:

³Er det den salva presten som syndar og fører skuld yver folket, so skal han til bot for den syndi han hev gjort, ofra til Herren ein ung ukse som ikkje hev lyte; det skal vera syndofferet hans.

⁴Han skal leida uksen fram for Herrens åsyn, til døri åt møtetjeldet, og han skal leggja handi på hovudet åt uksen, og han skal slakta uksen for Herrens åsyn.

⁵So skal han, den salva presten, taka noko av ukseblodet og bera det inn i møtetjeldet.

⁶Og han, presten, skal duppa fingeren i blodet, og han skal skvetta av blodet sju gonger for Herrens åsyn, framanfor forhenget i heilagdomen.

⁷Noko av blodet skal han strjuka på horni på altaret med den angande røykjelsen, det som stend framfor Herrens åsyn i møtetjeldet, og det som er att av ukseblodet, skal han hella ut innmed foten på brennofferaltaret, som stend framanfor døri til møtetjeldet.

⁸Alt feittet som er på syndofferuksen, skal han taka utor han, både netja og alt feittet som er på innvolen,

⁹og båe nyro med talgi som er på dei og rekk burtåt låri, og den store levreflaga - den skal han skjera utor i hop med nyro -

¹⁰alt dette skal han taka ut, like eins som på takkofferuksen, og so skal han brenna det på brennofferaltaret.

¹¹Men hudi av uksen og alt kjøtet, med hovudet og føtene, og innvolen og møki,

¹²heile uksen, skal han føra ut or lægret til ein rein stad, der dei slær ut oska, og brenn det upp med ved; der som oska vert slegi ut, der skal dei brenna det.

¹³Hev heile Israels-lyden misfare seg, hev folket seg uvitande gjort noko av det som Herren hev forbode å gjera, og ført skuld yver seg,

¹⁴og det sidan vert kunnigt kva dei hev synda i, so skal folket ofra ein ung ukse til syndoffer. Den skal dei leida fram åt møtetjeldet,

¹⁵og dei eldste av lyden skal leggja hendene på hovudet åt uksen for Herrens åsyn, og so skal uksen slaktast for Herrens åsyn.

¹⁶Den salva presten skal bera noko av ukseblodet inn i møtetjeldet,

¹⁷og han, presten, skal duppa fingeren i blodet og skvetta sju gonger for Herrens åsyn, framanfor forhenget.

¹⁸Noko av blodet skal han strjuka på horni åt det altaret som stend framfor Herrens åsyn i møtetjeldet, og det som er att av blodet, skal han hella ut innmed foten på brennofferaltaret, som stend framanfor døri til møtetjeldet.

¹⁹Alt feittet skal han taka utor uksen og brenna det på altaret.

²⁰Som han gjorde med hin syndofferuksen, so skal han gjera med denne og. Soleis skal presten gjera soning for dei, so dei fær tilgjeving.

²¹Sidan skal dei føra uksen utanfor lægret og brenna han, liksom dei brende den fyrste uksen. Dette er syndofferet for lyden.

²²Når ein hovding misfer seg og uviljande gjer noko av det som Herren hans Gud hev forbode å gjera, og soleis fører skuld yver seg,

²³og det vert kunnigt for han kva han hev synda i, so skal han koma med ei offergåva, og det skal vera ein geitebukk, ein som ikkje hev lyte.

²⁴Han skal leggja handi på hovudet åt bukken og slakta han på same staden som dei slaktar brennofferet for Herrens åsyn; det er eit syndoffer.

²⁵Presten skal taka noko av syndofferblodet på fingeren og strjuka det på horni åt brennofferaltaret, og det som er att av blodet, skal han hella ut innmed foten på brennofferaltaret.

²⁶Og alt feittet skal han brenna på altaret liksom han gjorde med feittet av takkofferet. Soleis skal presten gjera soning for han og reinsa han frå syndi hans, so han fær tilgjeving.

²⁷Er det ein ålmugemann som uviljande syndar mot eit av Herrens bod og gjer noko som han ikkje skulde gjera, so han fører skuld yver seg,

²⁸og det vert kunnigt for han kva han hev synda i, so skal han til bot for den syndi han hev gjort, koma med ei offergåva, og det skal vera ei geit, ei som ikkje hev lyte.

²⁹Han skal leggja handi på hovudet åt syndofferdyret, og han skal slakta syndofferdyret på same staden som dei slaktar brennofferet.

³⁰Og presten skal taka noko av blodet på fingeren og strjuka det på horni åt brennofferaltaret, og det som er att av blodet, skal han hella ut innmed altarfoten.

³¹Alt feittet skal han taka utor, liksom dei tek ut feittet på takkofferet, og presten skal leggja det på altaret og brenna det til godange for Herren. Soleis skal presten gjera soning for han, so han fær tilgjeving.

³²Vil han heller taka ein sau til syndoffer, so skal han koma med ei søya som ikkje hev lyte.

³³Han skal leggja handi på hovudet åt offerdyret, og so skal han slakta det til syndoffer på same staden som dei slaktar brennofferet.

³⁴Og presten skal taka noko av syndofferblodet på fingeren og strjuka det på horni åt brennofferaltaret, og det som er att av blodet, skal han hella ut innmed altarfoten.

³⁵Alt feittet skal han taka utor, liksom dei gjer med takkoffersauen, og presten skal brenna det på altaret saman med Herrens eldofferet. Soleis skal presten gjera soning for han for den syndi han hev gjort, so han fær tilgjeving.