Read nynorsk 1938 Tredje Mosebok 9 Bible Online

Tredje Mosebok 9 - nynorsk 1938 bible

Tredje Mosebok 9

¹Då den åttande dagen var komen, kalla Moses til seg Aron og sønene hans og dei øvste i Israel,

²og han sa til Aron: Tak ein uksekalv til syndoffer og ein ver til brennoffer, lytelause båe tvo, og leid dei fram for Herrens åsyn!

³Og du skal tala til Israels-borni og segja: Tak ein geitebukk til syndoffer og ein kalv og eit lamb, årsgamle og lytelause båe tvo, til brennoffer,

⁴og ein ukse og ein ver til takkoffer - dei skal ofrast for Herrens åsyn - og so eit matoffer som er tillaga med olje! For i dag vil Herren syna seg for dykk.

⁵So henta dei det som Moses hadde sagt, og sette det framanfor møtetjeldet, og heile lyden gjekk innåt og stod for Herrens åsyn.

⁶Og Moses sa: Soleis hev Herren sagt de skal gjera, so skal herlegdomen åt Herren syna seg for dykk.

⁷So sa han til Aron: Stig fram åt altaret og ofra syndofferet og brennofferet ditt og gjer soning for deg og for folket, og ber so fram offeret frå folket og gjer soning for dei, soleis som Herren hev sagt!

⁸So steig Aron fram åt altaret og slakta kalven som skulde vera syndoffer for han sjølv.

⁹Sønene hans gav han blodet, og han duppa fingeren i blodet og strauk det på altarhorni, og det som var att av blodet, helte han ut innmed altarfoten.

¹⁰Feittet og nyro og den store levreflaga av syndofferdyret brende han på altaret, soleis som Herren hadde sagt Moses fyre;

¹¹men kjøtet og hudi brende han i elden utanfor lægret.

¹²So slakta han brennofferdyret. Sønene hans gav han blodet, og han skvette det rundt ikring på altaret.

¹³Sidan rette dei sjølve brennofferet til han, stykke for stykke, og hovudet, og han brende det på altaret.

¹⁴Innvolen og føtene tvo han i vatn, og so brende han det og på altaret i hop med hitt.

¹⁵So bar han fram offeret frå folket. Fyrst tok han bukken som skulde vera syndoffer for folket, og slakta han og bar han fram til syndoffer, liksom det fyrste offerdyret.

¹⁶Sameleis førde han fram brennofferet og ofra det på rette gjerdi.

¹⁷Sidan bar han fram matofferet; av det tok han ein neve og brende på altaret umfram morgon-brennofferet.

¹⁸So slakta han uksen og veren som skulde vera takkofferet frå folket; sønene hans gav han blodet, og han skvette det rundt ikring på altaret.

¹⁹Og feittet av uksen, og spælen og netja og nyro og den store levreflaga av veren,

²⁰alt feittet, la dei uppå bringestykki. Og Aron brende feittet på altaret;

²¹men bringestykki og det høgre låret svinga han att og fram for Herrens åsyn, som Moses hadde sagt til han.

²²Og Aron lyfte hendene yver folket og velsigna dei, og so steig han ned, etter han hadde bore fram syndofferet og brennofferet og takkofferet.

²³Sidan gjekk Moses og Aron inn i møtetjeldet, og då dei kom ut att, velsigna dei folket. Då synte herlegdomen åt Herren seg for heile folket,

²⁴og det for ut eld frå Herren åsyn og brende upp det som var på altaret, både brennofferet og feittet, og då folket såg det, ropa dei alle høgt av gleda og kasta seg ned med andletet mot jordi.