Read nynorsk 1938 Jeremia 1 Bible Online

Jeremia 1 - nynorsk 1938 bible

Jeremia 1

¹Ord av Jeremias Hilkiasson, ein av prestane i Anatot i Benjaminslandet.

²Til han kom Herrens ord i dei dagane då Josias Amonsson var konge i Juda, i det trettande styringsåret hans,

³og sidan i dei dagane då Jojakim Josiasson var konge i Juda, alt til slutten av det ellevte styringsåret åt Sedekias Josiasson, Juda-kongen, då Jerusalems-buane vart burtførde i den femte månaden.

⁴Herrens ord kom til meg, og det lydde so:

⁵Fyrr eg skapte deg i morslivet, kjende eg deg, og fyrr du kom ut or morsfanget, helga eg deg; til profet åt folki sette eg deg.

⁶Men eg sa: Å, Herre, Herre! Sjå, eg kann ikkje med å tala; for eg er so ung.

⁷Då sa Herren til meg: Seg ikkje: Eg er so ung! Men til alle som eg sender deg til, skal du ganga, og alt det eg byd deg, skal du tala.

⁸Ikkje ottast dei! For eg er med deg og vil berga deg, segjer Herren.

⁹Og Herren rette ut handi og tok på munnen min. So sa Herren til meg: Sjå, eg legg ordi mine i din munn.

¹⁰Sjå, eg set deg i dag yver folki og yver kongeriki til å rykkja upp og riva ned, til å tyna og brjota ned, til å byggja og til å planta.

¹¹Herrens ord kom til meg; det lydde so: Kva ser du, Jeremias? Eg svara: Ein stav av vake-treet ser eg. /[1]

¹²Då sa Herren til meg: Gløgt såg du no; for vaka vil eg yver mitt ord, so eg set det i verk.

¹³So kom Herrens ord til meg andre gongen: Kva ser du? Eg svara: Ei kokande gryta ser eg; og nordantil snur ho seg hit.

¹⁴Då sa Herren til meg: Nordantil kjem ulukka sendande yver alle som bur i landet.

¹⁵For sjå, eg kallar på kvar ei folkeætt i riki der nord, segjer Herren, og dei skal koma og setja kvar sin stol attmed inngangen til portane i Jerusalem og mot alle murane um det rundt ikring og mot alle byane i Juda.

¹⁶Og eg vil segja mine domar yver dei for all deira vondskap, av di dei vende seg frå meg og brende røykjelse for andre gudar og tilbad dei verk deira hender gjorde.

¹⁷Men du - gyrd dine lender og statt upp og tala til dei alt det som eg byd deg! Ikkje ver redd dei, so ikkje eg skal gjera deg redd dei!

¹⁸Og sjå, eg gjer deg i dag til ei fast borg og til ein jarnstolpe og til ein koparmur mot alt landet: mot kongane i Juda, mot hovdingane, mot prestane og mot lyden i landet;

¹⁹dei skal strida mot deg, men ikkje vinna på deg; for eg er med deg, segjer Herren, og skal berga deg.