Read nynorsk 1938 Jeremia 26 Bible Online

Jeremia 26 - nynorsk 1938 bible

Jeremia 26

¹I den fyrste tidi som Jojakim Josiasson var konge i Juda, kom dette ordet frå Herren:

²So segjer Herren: Stig fram i fyregarden til Herrens hus og tala til alle Judabyane, som kjem og vil tilbeda i Herrens hus, tala alle dei ordi som eg hev sagt du skal tala til dei! Tak ikkje undan eit einaste ord!

³Kann henda dei vil høyra og venda um, kvar og ein frå sin vonde veg; då vil eg angra det vonde som eg tenkjer å gjera mot dei for den vonde framferdi deira.

⁴Og du skal segja til dei: So segjer Herren: Um de ikkje høyrer på meg og fylgjer den lovi som eg hev lagt fram for dykk,

⁵og høyrer på ordi åt tenarane mine, profetane, som eg sender dykk jamt og samt, endå de ikkje vil høyra,

⁶då vil eg fara åt med dette huset som med Silo, og denne byen vil eg gjera til ei forbanning for alle folkeslag på jordi.

⁷Og prestane og profetane og alt folket høyrde Jeremias tala desse ordi i Herrens hus.

⁸Og då Jeremias hadde tala til endes alt det som Herren hadde bode han å tala til heile folket, då tok dei han, prestane og profetane og alt folket, og sa: No skal du døy.

⁹Kvi hev du spått i Herrens namn og sagt: Det skal ganga med dette huset som med Silo, og denne byen skal verta øydd so ingen bur her? Og alt folket samla seg imot Jeremias i Herrens hus.

¹⁰Då hovdingane i Juda frette det, gjekk dei frå kongsgarden upp til Herrens hus og sette seg i inngangen til Herrens port, den nye.

¹¹Då sa prestane og profetane til hovdingane og til alt folket: Denne mannen er skuldig til å døy; for han hev spått mot denne byen, so som de hev høyrt med dykkar eigne øyro.

¹²Då sa Jeremias til alle hovdingane og til alt folket: Herren hev sendt meg til å spå imot dette huset og denne byen alt det som de hev høyrt.

¹³Lat då dykkar vegar og gjerningar betrast, og høyr på Herrens dykkar Guds røyst! So skal Herren angra det vonde som han hev tala imot dykk.

¹⁴Men eg, sjå, eg er i dykkar hand; gjer med meg det de tykkjer godt og rett!

¹⁵Men det skal de vita at um de drep meg, so fører de skuldlaust blod yver dykk og yver denne byen og yver dei som her bur; for Herren hev i sanning sendt meg til dykk so eg skulde tala alle desse ordi for øyro dykkar.

¹⁶Då sa hovdingane og alt folket til prestane og profetane: Denne mannen er ikkje skuldig til å døy, for i Herrens, vår Guds namn hev han tala til oss.

¹⁷Og nokre av dei øvste i landet stod upp og sa til heile folkehopen:

¹⁸Mika frå Moreset spådde i den tidi då Esekias var konge i Juda, og sa til alt folket i Juda: So segjer Herren, allhers Gud: Sion skal verta pløgt som ein åker, og Jerusalem skal verta til steinrøysar og tempelberget til skograbbar.

¹⁹Tok då Esekias, Juda-kongen, og heile Juda og drap han? Ottast han ikkje Herren og blidka han, so Herren angra det vonde han hadde tala mot dei? Men me held på å koma oss i den største ulukka.

²⁰Det var og ein annan mann som spådde i Herrens namn, Uria Semajason frå Kirjat-Jearim, og han spådde mot denne byen og dette landet nett på same måten som Jeremias.

²¹Men då kong Jojakim og alle kjempone hans og alle hovdingane høyrde ordi hans, so vilde kongen drepa han; men då Uria frette det, vart han redd og flydde og kom til Egyptarland.

²²Då sende kong Jojakim nokre menner til Egyptarland, Elnatan Akborsson og nokre andre menner med han,

²³og dei henta Uria frå Egyptarlandet og for med han til kong Jojakim; og han let drepa han med sverd og kasta liket hans millom ålmugegravene.

²⁴Men Akikam Safansson heldt si hand yver Jeremias, so han ikkje vart gjeven i hendene på folket og miste livet.