Read nynorsk 1938 Jeremia 28 Bible Online

Jeremia 28 - nynorsk 1938 bible

Jeremia 28

¹Same året, i den fyrste tidi Sedekias Josiasson var konge i Juda, i det fjorde året, i femte månaden, sa Hananja Assursson, profeten frå Gibeon, til meg i Herrens hus so prestane og alt folket høyrde det:

²So segjer Herren, allhers Gud, Israels Gud: Eg hev brote sund Babel-kongens åk.

³Um tvo år vil eg føra attende til denne staden alle dei gognene i Herrens hus som Nebukadnesar, Babel-kongen, tok frå denne staden og førde til Babel.

⁴Og Jekonja Jojakimsson, Juda-kongen, og alle hine burtførde frå Juda som er komne til Babel, fører eg attende til denne staden, segjer Herren; for eg bryt sund Babel-kongens åk.

⁵Då svara profeten Jeremias profeten Hananja so dei høyrde det både prestane og alt folket som stod i Herrens hus -

⁶profeten Jeremias sa: Amen! Det gjere Herren! Herren setje i verk det som du hev spått, so han fører attende frå Babel til denne staden gognene i Herrens hus og alle dei burtførde!

⁷Men høyr no det ordet som eg talar for øyro på deg og alt folket:

⁸Dei profetane som hev vore fyre meg og deg frå ævordsleg tid, dei spådde mot mange land og store rike um ufred og ulukka og sott.

⁹Den profeten som spår um fred - når ordi åt den profeten sannar seg, då kann alle sjå at Herren i sanning hev sendt den profeten.

¹⁰Då tok profeten Hananja åket av nakken på profeten Jeremias og braut det sund.

¹¹Og Hananja sa so alt folket høyrde det: So segjer Herren: Soleis vil eg um tvo år brjota sund Nebukadnesars, Babel-kongens, åk og taka det av nakken på alle folki. Då gjekk profeten Jeremias sin veg.

¹²Men etter profeten Hananja hadde brote sund åket og teke det av nakken på profeten Jeremias, kom Herrens ord til Jeremias, og det lydde so:

¹³Gakk og seg til Hananja: So segjer Herren: Eit tre-åk hev du brote sund, men att-istaden hev du laga eit jarn-åk.

¹⁴For so segjer Herren, allhers Gud, Israels Gud: Eit jarn-åk hev eg lagt på nakken åt alle desse folkeslagi, so dei skal tena Nebukadnesar, Babel-kongen, og dei lyt tena han; ja, jamvel dyri på marki hev eg gjeve han.

¹⁵Då sa profeten Jeremias til profeten Hananja: Høyr no, Hananja! Herren hev ikkje sendt deg, men du hev fenge dette folket til å lita på lygn.

¹⁶Difor segjer Herren so: Sjå, eg tek deg burt frå jordi; i dette året skal du døy, for di du hev preika fråfall frå Herren.

¹⁷Og profeten Hananja døydde same året, i sjuande månaden.