Read nynorsk 1938 Jeremia 36 Bible Online

Jeremia 36 - nynorsk 1938 bible

Jeremia 36

¹I det fjorde året av Jojakim Josiassons kongedøme i Juda kom dette ordet til Jeremias frå Herren:

²Tak deg ein bokrull og skriv i han alle dei ordi eg hev tala til deg um Israel og Juda og alle heidningefolki frå den dagen eg fyrst tala til deg, frå den tidi Josias rådde, og alt til denne dag!

³Kann henda Judas hus vil merkja seg all den ulukka som eg tenkjer å gjera dei, so dei kann venda um, kvar og ein frå sin vonde veg, og eg kann få tilgjeva dei deira misgjerning og synd.

⁴Då kalla Jeremias til seg Baruk, Nerijason, og Baruk skreiv i ein bokrull etter Jeremias' munn alle dei ord som Herren hadde tala til han:

⁵Og Jeremias tala til Baruk og sa: Eg sjølv er meinka, eg kann ikkje koma i Herrens hus.

⁶Men gakk du dit og les or rullen som du hev skrive etter min munn, Herrens ord for folket i Herrens hus ein fastedag! Du skal lesa henne for heile Juda og, dei som kjem frå byane sine.

⁷Kann henda dei kunde leggja si audmjuke bøn fram for Herrens åsyn og venda um, kvar og ein frå sin vonde veg; for stor er den vreiden og harmen som Herren hev truga dette folket med.

⁸Og Baruk Nerijason gjorde plent so som profeten Jeremias hadde bede han, og las Herrens ord or boki i Herrens hus.

⁹For i det femte året av Jojakim Josiassons kongedøme i Juda, i niande månaden, lyste dei på at alt folket i Jerusalem og alt folket som var kome frå Judabyane til Jerusalem, skulde fasta for Herrens åsyn.

¹⁰Då las Baruk upp or boki Jeremias' ord i Herrens hus, i koven åt Gemarja Safansson, riksskrivaren, i øvre fyregarden, attmed inngangen til den nye porten i Herrens hus, medan alt folket høyrde på.

¹¹Då Mikaja, son åt Gemarja Safansson, høyrde at alle Herrens ord vart upplesne or boki,

¹²gjekk han ned i kongsgarden, inn i riksskrivar-koven, og der fann han alle hovdingane sitjande: riksskrivaren Elisama og Delaja Sjemajason og Elnatan Akborsson og Gemarja Safansson og Sedekias Hananjason, og alle hine hovdingane.

¹³Og Mika sa ifrå um alle dei ordi han hadde høyrt då Baruk las upp or boki for folket.

¹⁴Då sende alle hovdingane Jehudi, son åt Netanja, son åt Selemja Kusison, til Baruk og sa: Tak med deg rullen som du las upp for folket, og kom hit! Og Baruk Nerijason tok rullen med seg og kom til dei.

¹⁵Dei sa til han: Set deg og les han for oss! Og Baruk las for dei.

¹⁶Men då dei hadde høyrt alle ordi, såg dei forfærde på kvarandre og sa til Baruk: Me lyt segja frå til kongen um alt dette.

¹⁷So spurde dei Baruk: Seg oss korleis du skreiv alle desse ordi etter hans munn!

¹⁸Baruk svara: Med sin munn sa han meg alle desse ordi fyre, og eg skreiv dei i boki med blekk.

¹⁹Då sa hovdingane til Baruk: Gakk og gøym dykk, du og Jeremias, og lat ingen vita kvar de er!

²⁰So gjekk dei inn til kongen i fyregarden, men rullen la dei ned i koven åt riksskrivaren Elisama; og dei fortalde alt dette til kongen.

²¹Då sende kongen Jehudi av stad etter rullen, og han henta han frå koven åt riksskrivaren Elisama. Sidan las Jehudi han upp for kongen og alle hovdingane som stod hjå kongen.

²²Kongen sat i vinterhalli - det var i den niande månaden - og det brann eld i ei glodpanna framfor han,

²³og då Jehudi hadde lese tri eller fire teigar, skar kongen rullen sund med ein pennekniv og kasta han på elden i glodpanna, til heile rullen var uppbrend i elden der i glodpanna.

²⁴Og dei reddast ikkje og reiv ikkje sund klædi sine, korkje kongen eller nokon av tenarane hans som høyrde desse ordi,

²⁵og endå Elnatan og Delaja og Gemarja naudbad kongen at han ikkje måtte brenna upp rullen, høyrde han ikkje på dei.

²⁶So bad kongen Jerahme'el, kongssonen, og Seraja, Asrielsson og Selemja Abde'elsson å taka skrivaren Baruk og profeten Jeremias; men Herren løynde dei.

²⁷Då kom Herrens ord til Jeremias, etter kongen hadde brent upp rullen med dei ordi som Baruk hadde skrive etter Jeremias' munn:

²⁸Tak deg ein annan rull og skriv i han alle dei ordi som stod i den fyrre rullen, den som Jojakim, Juda-kongen, brende upp!

²⁹Og um Jojakim, Juda-kongen, skal du segja: So segjer Herren: Du brende denne rullen og sa: Kvi skreiv du so i han: Babel-kongen skal koma og øydeleggja dette landet og rydja ut or det folk og fe?

³⁰Difor segjer Herren so um Jojakim, Juda-kongen: Han skal ingen ætting hava som kann sitja på Davids kongsstol, og liket hans skal liggja burtslengt i heten um dagen og i kulden um natti.

³¹Og eg vil heimsøkja han og ætti hans og tenarane hans for deira misgjerning, og eg vil lata koma yver dei og yver Jerusalems-buane og Juda-mennene all den ulukka som eg hev varsla dei um utan at dei vilde høyra.

³²Då tok Jeremias ein annan rull og gav han til skrivaren Baruk Nerijason, og han skreiv i han etter Jeremias' munn alle ordi i den boki som Jojakim, Juda-kongen, hadde brent upp i elden, og til dei vart det endå lagt mykje av same slaget.