Read nynorsk 1938 Jeremia 37 Bible Online

Jeremia 37 - nynorsk 1938 bible

Jeremia 37

¹Sedekias Josiasson vart konge etter Konja Jojakimsson; for Nebukadnesar, Babel-kongen, hadde sett han til konge i Judalandet. /[55]

²Men korkje han eller tenarane hans eller landslyden høyrde på Herrens ord, som han tala ved profeten Jeremias.

³Og kong Sedekias sende Jehukal Selemjason og presten Sefanja Ma'asejason til profeten Jeremias med den helsingi: Bed for oss til Herren vår Gud!

⁴Jeremias gjekk den-tid ut og inn millom folket; dei hadde endå ikkje sett han i fengsel.

⁵Og heren åt Farao var då faren ut frå Egyptarland, og då kaldearane, som kringsette Jerusalem, spurde det, for dei burt frå Jerusalem.

⁶Då kom Herrens ord til profeten Jeremias, og det lydde so:

⁷So segjer Herren, Israels Gud: So skal de segja til Juda-kongen, som sende dykk av stad til å spyrja meg: Sjå, Farao-heren, som er faren ut til å hjelpa dykk, kjem til å snu um att til landet sitt, til Egyptarland,

⁸og kaldearane skal koma att og strida mot denne byen, og dei skal taka han og brenna han upp.

⁹So segjer Herren: Dåra ikkje dykk sjølve med di de segjer: Kaldearane fer no burt frå oss for ollo! For dei fer ikkje burt.

¹⁰Um de so slo heile kaldearheren som strider mot dykk, og det berre var att hjå dei nokre særde menner, so skulde dei risa upp i kvar si tjeldbu og brenna upp denne byen.

¹¹Då kaldearheren hadde fare burt frå Jerusalem for Farao-heren skuld,

¹²gjekk Jeremias ut or Jerusalem midt ibland folket og vilde fara til Benjaminslandet og henta arveluten sin derifrå.

¹³Men då han kom til Benjaminsporten, so stod der ein hovding for vakti; han heitte Jerija og var son åt Selemja Hananjason. Han treiv i profeten Jeremias og sa: Du vil laupa burt til kaldearane.

¹⁴Då sa Jeremias: Det er lygn! eg vil ikkje laupa burt til kaldearane! Men Jerija høyrde ikkje på han, og Jerija treiv i Jeremias og for med han til hovdingane.

¹⁵Hovdingane harmast på Jeremias og slo han. So sette dei han i fangehuset, i huset åt riksskrivaren Jonatan; for det hadde dei gjort til fengsel.

¹⁶Då Jeremias var komen i fangeholet, i kjellaren, og hadde sete der i mange dagar,

¹⁷sende kong Sedekias bod og let henta han, og kongen spurde han i huset sitt i løynd og sa: Hev det kome noko ord frå Herren? Jeremias svara: Ja. Og so sa han: Du skal verta gjeven i hendene på Babel-kongen.

¹⁸Då sa Jeremias til kong Sedekias: Kva hev eg synda mot deg og mot tenarane dine og mot dette folket, sidan de hev sett meg i fengsel?

¹⁹Og kvar er no profetane dykkar, som spådde åt dykk og sa: Babel-kongen skal ikkje koma yver dykk og yver dette landet?

²⁰Og høyr no, herre konge! Å, lat mi audmjuke bøn koma fram for di åsyn og send meg ikkje attende til huset åt riksskrivaren Jonatan, so eg ikkje skal døy der!

²¹Sedekias gav då påbod, og so sette dei Jeremias i varveitsla i vaktgarden og gav han ein brødleiv um dagen frå Bakargata, til alt brødet i byen var uppete. Og Jeremias vart sitjande i vaktgarden.