Read nynorsk 1938 Jeremia 38 Bible Online

Jeremia 38 - nynorsk 1938 bible

Jeremia 38

¹Men Sefatja Mattansson og Gedalja Pashursson og Jukal Selemjason og Pashur Malkiason høyrde dei ordi som Jeremias tala til alt folket:

²So segjer Herren: Den som vert verande i denne byen, skal døy for sverd og av svolt og i sott; men den som gjeng ut til kaldearane, skal få leva, han skal få sitt liv til herfang og leva.

³So segjer Herren: Denne byen skal visseleg verta gjeven i hendene på heren åt Babel-kongen, og han skal taka han.

⁴Då sa hovdingane til kongen: Lat dei drepa denne mannen, etter di han gjer folket modlaust, både hermennene som er att i denne byen, og alt hitt folket, med di han talar slike ord til dei! For denne mannen vil ikkje dette folket vel, men vondt.

⁵Då sa kong Sedekias: Sjå, han er i dykkar hand; for kongen maktast ikkje noko imot dykk.

⁶Då tok dei Jeremias og kasta han i brunnen til kongssonen Malkia, den som var i vaktgarden; dei firte Jeremias ned med tog. Det var ikkje vatn i brunnen, men dy, og Jeremias sokk ned i dyet.

⁷Men etiopen Ebed-Melek, ein gjelding som tente i kongsgarden, frette at dei hadde kasta Jeremias i brunnen - kongen sat då i Benjaminsporten.

⁸So gjekk Ebed-Melek ut or kongsgarden og tala til kongen og sa:

⁹Herre konge! Ille hev desse mennene gjort i all si åtferd mot profeten Jeremias; dei hev kasta han i brunnen, og han døyr av svolt der han er, for det finst ikkje meir brød i byen.

¹⁰Då sa kongen til Ebed-Melek etiopen: Tak med deg herifrå tretti mann og drag profeten Jeremias upp or brunnen fyrr han døyr!

¹¹Og Ebed-Melek tok mennene med seg og gjekk inn i kongsgarden, ned i romet under skattkammeret, og tok der fillor av sundrivne og utslitne klæde og fira dei med tog ned i brunnen til Jeremias.

¹²Og Ebed-Melek, etiopen, sa til Jeremias: Legg fillone av dei sundrivne og utslitne klædi under armane dine, under togi! Og Jeremias gjorde so.

¹³So drog dei Jeremias upp med togi og fekk han upp or brunnen; og Jeremias vart sitjande i vaktgarden.

¹⁴Sidan sende kong Sedekias bod og let henta profeten Jeremias til seg i den tridje inngangen til Herrens hus. Og kongen sa til Jeremias: Eg vil spyrja deg um noko; løyn ikkje noko for meg!

¹⁵Jeremias svara: Um eg segjer deg det, vil du då ikkje drepa meg? Og um eg gjev deg ei råd, so lyder du ikkje på meg.

¹⁶Då gjorde kong Sedekias eiden sin til Jeremias i dulsmål og sa: So visst som Herren lever, han som hev gjeve oss dette vårt liv, vil eg ikkje drepa deg og ikkje gjeva deg i hendene på desse mennene som stend deg etter livet.

¹⁷Då sa Jeremias til Sedekias: So segjer Herren, allhers Gud, Israels Gud: Gjeng du ut til hovdingane åt Babel-kongen, skal du få leva, og denne byen skal ikkje verta uppbrend, men du skal få leva, du og ditt hus.

¹⁸Men gjeng du ikkje ut til hovdingane åt Babel-kongen, so skal denne byen verta gjeven i hendene på kaldearane, og dei skal brenna han upp, og du sjølv skal ikkje koma deg undan deira hender.

¹⁹Kong Sedekias svara: Eg er redd dei jødane som hev gjenge yver til kaldearane, at eg kunde verta gjeven i deira hender, og at dei skulde fara stygt åt med meg.

²⁰Men Jeremias sa: Du skal ikkje verta gjeven til dei; høyr berre på Herrens røyst i det som eg talar til deg, so skal det ganga deg vel, og du fær leva!

²¹Men dreg du deg undan og ikkje gjeng ut, då er dette det ordet Herren hev synt meg:

²²Sjå, alle kvinnone som er att i Juda-kongens hus, skal verta førde ut til hovdingane åt Babel-kongen, og dei skal segja til deg: Dine gode vener hev lokka deg og vunne på deg; då føtene dine sokk ned i dya, drog dei seg undan.

²³Og alle konone dine og borni dine skal dei leida ut til kaldearane, og du sjølv skal ikkje sleppa undan deira hender, men Babel-kongen skal taka deg med si hand, og for di skuld skal denne byen verta uppbrend.

²⁴Då sa Sedekias til Jeremias: Lat ingen få vita um denne samtalen, elles vert det din bane!

²⁵Og fær hovdingane høyra at eg hev tala med deg, og dei so kjem til deg og segjer: Lat oss få vita kva du hev sagt til kongen! Løyn det ikkje for oss, elles drep me deg! Kva hev kongen sagt til deg?

²⁶då skal du segja til dei: Eg bar mi audmjuke bøn fram for kongens åsyn; eg bad at han ikkje måtte senda meg attende til Jonatans hus til å døy der.

²⁷Og då alle hovdingane kom til Jeremias og spurde han, svara han dei heiltupp so som kongen hadde sagt. Då tagde dei og let han vera i fred; for saki hadde ikkje vorte kjend.

²⁸Og Jeremias sat i vaktgarden alt til den dagen då Jerusalem vart teke.