Read nynorsk 1938 Jeremia 39 Bible Online

Jeremia 39 - nynorsk 1938 bible

Jeremia 39

¹Då Jerusalem var teke - i det niande året av Sedekias' kongedøme i Juda, i tiande månaden, kom Nebukadnesar, Babel-kongen, til Jerusalem med heile heren sin og kringsette byen;

²i det ellevte styringsåret åt Sedekias, den niande dagen i fjorde månaden, braut dei inn i byen -

³då kom alle stormennene åt Babel-kongen og sette seg i Midporten: Nergal-Sareser, Samgar-Nebu, Sarsekim, den øvste hirdmannen, Nergal-Sareser, den øvste av vismennene, og alle dei andre stormennene hjå Babel-kongen.

⁴Men då Sedekias, Juda-kongen, og alt stridsfolket såg dei, rømde dei og for um natti ut or byen på vegen til kongshagen gjenom porten millom båe murane, og kongen tok vegen til moane.

⁵Men kaldearheren sette etter dei og nådde Sedekias att på Jerikomoane, og dei tok han og førde han upp til Ribla i Hamatlandet, der Nebukadnesar, Babel-kongen, var, og han sa domen yver han.

⁶Babel-kongen drap sønene åt Sedekias i Ribla for augo hans; sameleis drap Babel-kongen alle stormennene i Juda.

⁷Sedekias let han blinda og binda med tvo koparlekkjor; han skulde førast til Babel.

⁸Kongsgarden og husi som høyrde folket til, sette kaldearane eld på, og murane kring Jerusalem reiv dei ned.

⁹Resten av folket, dei som var att i byen, og dei som var falne ifrå og hadde gjenge yver til han, og resten av folket, dei som var att, dei førde Nebusaradan, hovdingen for livvakti, til Babel.

¹⁰Berre noko ålmugefolk, som inkje åtte, let Nebusaradan, hovdingen for livvakti, vera att i Judalandet, og samstundes gav han dei vinhagar og åkrar.

¹¹Nebukadnesar, Babel-kongen, gav Nebusaradan, hovdingen for livvakti, påbod um Jeremias og sa:

¹²Tak han og sjå til med han, og gjer han ikkje noko vondt! Gjer med han so som han sjølv segjer til deg!

¹³Då sende Nebusaradan, hovdingen for livvakti, og Nebusasban, den øvste hirdmannen, og Nergal-Sareser, den øvste av vismennene, og alle stormennene åt Babel-kongen,

¹⁴dei sende bod og let henta Jeremias frå vaktgarden, og dei gav han til Gedalja, son åt Akikam Safansson, so han skulde taka han med seg heim; soleis vart han då buande der hjå folket.

¹⁵Men til Jeremias hadde Herrens ord kome medan han sat innestengd i vaktgarden, og det lydde so:

¹⁶Gakk og seg til Ebed-Melek, etiopen: So segjer Herren, allhers Gud, Israels Gud: Sjå, eg let koma yver denne byen det eg hev varsla, til ulukka og ikkje til lukka, og det skal henda for augo dine den dagen.

¹⁷Men deg vil eg berga den dagen, segjer Herren, og du skal ikkje verta gjeven i hendene på dei mennene som du reddast.

¹⁸For eg vil lata deg sleppa undan, og du skal ikkje falla for sverd, men få ditt liv til herfang, av di du leit på meg, segjer Herren.