Read nynorsk 1938 Jeremia 40 Bible Online

Jeremia 40 - nynorsk 1938 bible

Jeremia 40

¹Dette er det ordet som kom til Jeremias frå Herren etter at Nebusaradan, hovdingen yver livvakti, hadde slept han laus frå Rama - han henta han medan han var bunden med lekkjor i lag med alle fangane frå Jerusalem og Juda som vart burtførde til Babel.

²Hovdingen for livvakti henta Jeremias og sa til han: Herren din Gud hev varsla denne ulukka yver denne staden.

³Og Herren let det koma og gjorde som han hadde varsla; for de hadde synda mot Herren og ikkje lydt røysti hans, og so råka dette dykk.

⁴Og sjå, no hev eg løyst lekkjone av hendene dine i dag. Um du so synest, kann du vera med meg til Babel, so skal eg sjå til med deg. Men er du ikkje huga på å vera med meg til Babel, so lat vera. Sjå, du hev heile landet fyre deg; kvar du synest godt og rett å ganga, dit kann du ganga.

⁵Men då han endå ikkje snudde seg til nokon kant, sa han: So far attende til Gedalja, son åt Akikam Safansson, som Babel-kongen hev sett yver Judabyane, og ver hjå han i lag med folket, eller gakk kvar du synest det er rett å ganga! Og hovdingen for livvakti gav han nistemat og gåvor og let han fara.

⁶Og Jeremias for til Gedalja Akikamsson i Mispa og var hjå han i lag med det folket som var att i landet.

⁷Då so alle herhovdingane, som var ute i bygdene, dei og mennene deira, spurde at Babel-kongen hadde sett Gedalja Akikamsson til å styra landet og gjeve han tilsynet med menner og kvinnor og born og dei av ålmugen i landet som ikkje var burtførde til Babel,

⁸so kom dei til Gedalja i Mispa, både Ismael Netanjason og Johanan og Jonatan, sønene til Kareah, og Seraja Tanhumetsson og sønene åt Ofai frå Netofa og Jesanja, ma'akatitsonen, og mennene deira med dei.

⁹Og Gedalja, son åt Akikam Safansson, gjorde dei og mennene deira eiden sin og sa: Ver ikkje redde å tena kaldearane! Ver i landet og ten Babel-kongen, so skal det ganga dykk vel!

¹⁰Sjå, eg vert buande i Mispa, so eg kann taka imot dei kaldearar som kjem til oss, men de lyt samla vin og frukt og olje og leggja det i kjeraldi dykkar, og de lyt vera i byane dykkar, som de hev teke til eiga.

¹¹Alle jødane som var i Moab og hjå Ammons-borni og i Edom, og dei som var i alle andre land, frette og at Babel-kongen hadde late nokre av jødane vera att i Juda, og at han hadde sett Gedalja son åt Akikam Safansson, yver dei.

¹²Alle dei jødane for då heim att frå alle stadene som dei var drivne burt til, og kom til Judalandet, til Gedalja i Mispa, og dei samla vin og frukt i store mengder.

¹³Men Johanan Kareahsson og alle herhovdingane, som var ute i bygdene, kom til Gedalja i Mispa

¹⁴og sa til han: Veit du at Ba'alis, kongen yver Ammons-borni, hev sendt Ismael Netanjason til å slå deg i hel? Men Gedalja Akikamsson trudde dei ikkje.

¹⁵Då sa Johanan Kareahsson i løynd til Gedalja i Mispa: Lat meg ganga og drepa Ismael Netanjason! Ingen skal få vita det. Kvifor skal han slå deg i hel, og heile Juda, som hev samla seg um deg, vert spreidt, og leivningen av Juda verta tynt?

¹⁶Men Gedalja Akikamsson sa til Johanan Kareahsson: Gjer ikkje det! For det er lygn det du segjer um Ismael.