Read nynorsk 1938 Jeremia 41 Bible Online

Jeremia 41 - nynorsk 1938 bible

Jeremia 41

¹Men i den sjuande månaden kom Ismael son åt Netanja Elisamason, ein mann av kongsætti, ein av stormennene åt kongen, og ti menner med han til Gedalja Akikamsson i Mispa, og dei fekk seg mat saman der i Mispa.

²Då stod Ismael Netanjason upp, og dei ti mennene som var med han, og dei slo Gedalja, son åt Akikam Safansson, i hel med sverd - han drap han som Babel-kongen hadde sett til å styra landet.

³Ismael slo og i hel alle dei jødane som var hjå Gedalja i Mispa, og dei kaldearane som fanst der, stridsmennene.

⁴Andre dagen etter han hadde drepe Gedalja, og fyrr nokon visste det endå,

⁵kom det menner frå Sikem, frå Silo og Samaria, åtti i alt, med avraka skjegg og sundrivne klæde og med merke rispa i holdet, og dei hadde med seg matoffer og røykjelse til å bera fram i Herrens hus. /[56]

⁶Og Ismael Netanjason gjekk ut imot dei frå Mispa, og han gjekk og gret. Då han møtte dei, sa han til dei: Kom med til Gedalja Akikamsson!

⁷Men då dei var komne inn i byen, tok Ismael Netanjason og dei mennene som var med han, og drap dei og kasta dei i brunnen. /[57]

⁸Men millom dei var det ti menner som sa til Ismael: Drep oss ikkje! For me hev forråd gøymde ute på marki: kveite og bygg og olje og honning. Då let han dei vera og drap dei ikkje saman med brørne deira.

⁹Brunnen som Ismael kasta liki i av alle dei menner som han hadde drepe umfram Gedalja, var den same som kong Asa hadde laga då han hadde ufred med Baesa, Israels-kongen; den fyllte Ismael Netanjason med drepne menner.

¹⁰So førde Ismael burt heile leivningen av folket i Mispa, kongsdøtterne og alt folket som var att i Mispa, og som Nebusaradan, hovdingen for livvakti, hadde sett Gedalja Akikamsson yver - dei førde Ismael Netanjason burt fangar og gav seg på vegen, vilde fara yver til Ammons-borni.

¹¹Men då Johanan Kareahsson og alle herhovdingane som var med han, høyrde um alle dei illverki som Ismael Netanjason hadde gjort,

¹²tok dei alle mennene sine og drog av stad og vilde strida mot Ismael Netanjason, og dei fann han attmed det store vatnet i Gibeon. /[58]

¹³Då alt folket som var med Ismael, såg Johanan Kareahsson og alle herhovdingane som var med han, vart dei glade;

¹⁴og alt folket som Ismael hadde ført fangar frå Mispa, snudde og gjekk attende til Johanan Kareahsson.

¹⁵Men Ismael Netanjason slapp undan frå Johanan med åtte mann og for til Ammons-borni.

¹⁶Johanan Kareahsson og alle herhovdingane som var med han, tok då med seg alle som var att av folket, dei frå Mispa som han hadde vunne att frå Ismael Netanjason, etter Ismael hadde drepe Gedalja Akikamsson, både stridsmenner og kvinnor og born og hirdmenner, som han hadde ført attende frå Gibeon.

¹⁷Dei drog av stad, men stana i Kimham-herbyrget attmed Betlehem og vilde sidan halda fram med ferdi til Egyptarland

¹⁸- for kaldearane skuld; for dei var redde dei, av di Ismael Netanjason hadde drepe Gedalja Akikamsson som Babel-kongen hadde sett til å styra i landet.