Read nynorsk 1938 Jeremia 43 Bible Online

Jeremia 43 - nynorsk 1938 bible

Jeremia 43

¹Men då Jeremias var ferdig med å tala til alt folket alle Herrens, deira Guds ord, som Herren deira Gud hadde sendt han med til dei - alle desse ordi,

²då sa Asarja Hosajason og Johanan Kareahsson og alle dei ovmodige mennene, dei sa til Jeremias: Det er lygn det du segjer: Herren vår Gud hev ikkje sendt deg og sagt: De skal ikkje fara til Egyptarland og bu der.

³Men Baruk Nerijason eggjar deg upp imot oss, so me skal verta gjevne i hendene på kaldearane, og dei skal drepa oss eller føra oss burt til Babel.

⁴Og Johanan Kareahsson og alle herhovdingane og alt folket vilde ikkje høyra på Herrens røyst og vera i Judalandet.

⁵Men Johanan Kareahsson og alle herhovdingane tok alle som var att av Juda, dei som var komne heim att frå alle heidningefolki som dei hadde vore burtdrivne til, og vilde bu i Judalandet,

⁶mennene og kvinnone og småborni og kongsdøtterne og kvart eit liv som Nebusaradan, hovdingen for livvakti, hadde late vera att hjå Gedalja, son åt Akikam Safansson, og like eins profeten Jeremias og Baruk Nerijason,

⁷og for til Egyptarlandet, for dei høyrde ikkje på Herrens røyst; og so kom dei fram til Tahpanhes.

⁸Og Herrens ord kom til Jeremias i Tahpanhes; det lydde so:

⁹Tak deg nokre store steinar i handi og gøym dei i leiret attmed tiglomnen som stend ved inngangen til huset åt Farao i Tahpanhes, og lat nokre menner frå Juda sjå på det!

¹⁰Seg so til dei: So segjer Herren, allhers Gud, Israels Gud: Sjå eg sender bod og hentar min tenar Nebukadnesar, Babel-kongen, og set kongsstolen hans uppå desse steinane som eg hev gøymt, og han skal breida sitt drustelege teppe utyver dei.

¹¹Og han skal koma og slå Egyptarlandet; den som er etla åt dauden, lyt døy, og den som er etla til fange, vert fange, og den som er etla åt sverdet, lyt falla for sverd.

¹²Og eg vil setja eld på gudetempli i Egyptarland, og han skal brenna dei upp og føra gudane burt; han skal sveipa Egyptarlandet um seg, liksom hyrdingen sveiper kappa si um seg, og sidan skal han fara derifrå i fred.

¹³Og han skal krasa steinsulone i Betsemes i Egyptarlandet, og templi i Egyptarland skal han brenna upp. /[59]