Read nynorsk 1938 Klagesongane 5 Bible Online

Klagesongane 5 - nynorsk 1938 bible

Klagesongane 5

¹Kom i hug, Herre, det som hev hendt oss, skoda og sjå kor me vert hædde!

²Vår arv hev framande fenge, utlendingar våre hus.

³Farlause hev me vorte, hev ikkje far; møderne våre er som enkjor.

⁴Me lyt kjøpa det vatnet me drikk, vår ved lyt me betala.

⁵Våre forfylgjarar hev me på nakken; me er trøytte, me fær ikkje kvild.

⁶Egyptarland gav me oss under, og Assyria, so me kunde mettast med brød.

⁷Våre feder hev synda, dei er burte; me ber deira misgjerningar.

⁸Trælar er våre herrar; ingen riv oss ut or deira hand.

⁹Med livsfåre hentar me vårt brød, i otte for øydemarks-sverdet.

¹⁰Vår hud er glodheit som omnen for svolten som svid og brenn.

¹¹Kvinnor hev dei skjemt i Sion, møyar i byane i Juda.

¹²Hovdingar hev dei hengt, dei gamle hev dei ikkje vist vyrdnad.

¹³Unge menner bar kverni, og gutar seig ned med vedbyrdi på.

¹⁴Dei gamle sit ikkje lenger i porten, dei unge ikkje meir med sitt strengespel.

¹⁵Det er slutt med vår hjartans gleda, vår dans er umsnudd til sorg.

¹⁶Kruna hev falle av vårt hovud; usæle me, me hev synda!

¹⁷Difor er hjarta vårt sjukt, difor er augo våre dimme,

¹⁸for Sionfjellet skuld, som ligg audt; der renner no revar ikring.

¹⁹Du, Herre, sit æveleg konge, frå ætt til ætt stend din kongsstol.

²⁰Kvi skulde du æveleg gløyma oss, ganga frå oss for so lang ei tid?

²¹Herre, før oss atter til deg, so me kann koma attende! Nya upp att dagane våre, so dei vert som dei ein gong var!

²²For du kann vel ikkje reint ha støytt oss burt, vera so ovleg harm på oss.