Read nynorsk 1938 Esekiel 32 Bible Online

Esekiel 32 - nynorsk 1938 bible

Esekiel 32

¹I det tolvte året, den fyrste dagen i tolvte månaden, kom Herrens ord til meg, og det lydde so:

²Menneskeson, set i med ein syrgjesong yver Farao, kongen i Egyptarland, og seg til han: Ei ungløva millom folki vilde du vera lik, og so var du som draken i havet, og du for fram i elvane dine og grugga upp vatnet med føtene dine og rota upp straumane.

³So segjer Herren, Israels Gud: Difor sender eg skarar av mange folkeslag til å breida ut garnet mitt yver deg, og dei skal draga deg upp med noti mi.

⁴Eg vil kasta deg upp på land og slengja deg burt på marki, og eg vil lata alle fuglar i lufti slå seg ned på deg og dyri på heile jordi metta seg med deg.

⁵Eg vil kasta kjøtet ditt upp på fjelli og fylla dalane med den store skrotten din.

⁶Eg vil vatna landet med blodflaumen frå deg alt upp til fjelli, og bekkefari skal verta fulle av deg.

⁷Og når let deg slokna, vil eg breida yver himmelen og klæda hans stjernor i svart; yver soli vil eg breida skyer, og månen skal ikkje skina meir.

⁸Alle skinande himmel-ljos vil eg klæda i svart for di skuld, og eg vil lata myrker koma yver landet ditt, segjer Herren, Israels Gud.

⁹Eg vil skapa sorg i hjarto på mange folkeslag, når eg let din undergang spyrjast millom folki, i land som du ikkje kjenner.

¹⁰Eg vil gjera mange folkeslag forfærde yver deg, og deira kongar skal rysja i holdet yver deg, når eg svingar mitt sverd framfor augo deira; dei skal bivra kvar augneblink, kvar og ein for sitt liv, den dagen du fell.

¹¹For so segjer Herren, Israels Gud: Sverdet åt Babel-kongen skal koma yver deg.

¹²Din ståkande hop vil eg lata falla for sverdi at kjempor - valdsmenner millom folki er dei alle saman; dei skal tyna Egyptarlands ovmod, og heile den ståkande hopen skal verta øydd. /[65]

¹³Eg vil rydja ut alt feet der, som hev beitt attmed dei mange vatni, og ingen mannefot skal grugga dei meir, og ingi klauv skal grugga dei meir.

¹⁴Då vil eg lata vatni deira minka og løkene deira renna burt som olje, segjer Herren, Israels Gud,

¹⁵når eg gjer Egyptarlandet til ei audn, so landet ligg audt og tomt, av di eg slær ned alle som der bur; og dei skal sanna at eg er Herren.

¹⁶Ein syrgjesong er dette, og syngja han skal dei, folke-døtterne skal syngja han; yver Egyptarland med heile sin ståkande hop skal dei syngja han, segjer Herren, Israels Gud.

¹⁷I det tolvte året, den femtande dagen i månaden, kom Herrens ord til meg, og det lydde so:

¹⁸Menneskeson, barma deg yver Egyptarlands ståkande hop og send han ned, han og døtterne åt herlege folkeslag, til nedheimen, saman med dei som fer ned i gravi!

¹⁹Gjeng du framum nokon i venleik? Far ned og legg deg hjå dei u-umskorne!

²⁰Millom dei som er drepne med sverd, skal dei falla; sverdet er gjeve. Drag burt med det og med heile den ståkande hopen der! /[66][67][68]

²¹Hovdingane millom kjempone talar um han og hans hjelpesmenner midt utor helheimen: Ned er dei farne, der ligg dei, dei u-umskorne, drepne med sverd. /[69]

²²Der er Assur og heile hans flokk, rundt ikring han er hans graver; alle er dei drepne, falne for sverd;

²³han fekk sine graver inst inni hola, og hans flokk ligg rundt ikring hans grav; alle er dei drepne, falne for sverd, dei som breidde ut redsla i landet åt dei levande.

²⁴Der er Elam og heile hans ståkande hop rundt ikring hans grav; alle er dei drepne, falne for sverd, dei som u-umskorne for ned til nedheimen, dei som hadde breidt ut redsla for seg i landet åt dei levande og bar si skam med dei som fer ned i gravi.

²⁵Midt imillom drepne menner hev dei stelt til ei lega åt han med heile hans ståkande hop, rundt ikring han er hans graver; alle er dei u-umskorne, drepne med sverd, av di redsla for dei breidde seg i landet åt dei levande, og dei bar si skam med dei som fer ned i gravi; midt imillom drepne menner vart han lagd.

²⁶Der er Mesek-Tubal og heile hans ståkande hop, rundt ikring han er hans graver; alle er dei u-umskorne, drepne med sverd, av di dei hadde breidt ut redsla for seg i landet åt dei levande.

²⁷Skulde dei då ikkje liggja hjå kjempor, hjå dei som er falne av dei u-umskorne, som for ned i helheimen med sin stridsbunad og fekk sverdi sine lagde under sine hovud, og si misgjerning yver sine bein, av di det hadde vore redsla for kjempone i landet åt dei levande?

²⁸Du og skal verta krasa midt ibland u-umskorne og liggja hjå dei som er drepne med sverd.

²⁹Der er no Edom med sine kongar og alle sine fyrstar, som, med alt sitt velde, er lagde hjå dei som er drepne med sverd; dei skal liggja hjå dei u-umskorne og hjå dei som fer ned i gravi.

³⁰Der er no fyrstane frå Norderland alle saman, og alle Sidon-buane, som for ned med dei drepne og vart til skammar, endå dei i sitt velde hadde vore til skræmsla for folk, og u-umskorne fekk dei si lega hjå dei som var drepne med sverd, og dei bar si skam med dei som fer ned i gravi.

³¹Dei skal Farao sjå, og huggast yver heile sin ståkande hop; drepne med sverd er Farao og heile hans her, segjer Herren, Israels Gud.

³²For eg hev breidt ut redsla for han i landet åt dei levande, og han skal verta lagd hjå dei u-umskorne, hjå dei som er drepne med sverd, Farao sjølv og heile hans ståkande hop, segjer Herren, Israels Gud.