Read nynorsk 1938 Esekiel 34 Bible Online

Esekiel 34 - nynorsk 1938 bible

Esekiel 34

¹Herrens ord kom til meg, og det lydde so:

²Menneskeson, spå mot Israels hyrdingar, spå og seg til dei, til hyrdingane: So segjer Herren, Israels Gud: Usæle Israels hyrdingar, som røktar seg sjølve! Er det ikkje hjordi hyrdingen skal røkta?

³Feita et de, og med ulli klæder de dykk, det gjødde slaktar de; hjordi røktar de ikkje.

⁴Det veike hev de ikkje styrkt, det sjuke hev de ikkje lækt, det sundbrotne hev de ikkje bunde um, det burtdrivne hev de ikkje sanka, og det burtkomne hev de ikkje leita upp, men de hev fare hardt fram mot dei og med vald.

⁵So vart dei spreidde, av di dei var hyrdinglause; dei vart til føda for alle villdyr på marki, og spreidde vart dei.

⁶Forvilla fer sauene mine på alle fjell og på kvar ein høg haug; utyver alt landet er sauene mine spreidde, og ingen spør etter dei, og ingen leitar.

⁷Høyr difor Herrens ord, de hyrdingar!

⁸So visst som eg lever, segjer Herren, Israels Gud: Sanneleg, etter di sauene mine hev vorte til eit ran, og dei hev vorte til føda for alle villdyr på marki, av di dei var hyrdinglause, og hyrdingane mine ikkje spurde etter sauene mine, men hyrdingane røkta seg sjølve og ikkje røkta sauene mine -

⁹difor, de hyrdingar, høyr Herrens ord:

¹⁰So segjer Herren, Israels Gud: Sjå, eg kjem yver hyrdingane og vil krevja sauene mine av deira hand og taka frå dei gjætsla, so hyrdingane ikkje lenger skal røkta seg sjølve; og eg vil berga sauene mine frå deira munn, so dei ikkje skal vera til føda for dei.

¹¹For so segjer Herren, Israels Gud: Sjå, eg sjølv kjem og vil spyrja etter sauene mine og sjå til dei.

¹²Liksom ein hyrding ser til si hjord den dagen han er millom dei spreidde sauene sine, soleis vil eg sjå til sauene mine og berga dei frå alle stader der dei er spreidde på ein dag med skyer og myrkeskodda.

¹³Eg vil føra dei ut ifrå folkeslagi og sanka dei ut or landi og føra dei til deira eige land, og eg vil gjæta dei i Israelsfjelli, i dalane og kvar dei elles bur i landet.

¹⁴I ei god gjætslemark vil eg gjæta dei, i Israels høge fjell skal deira hamning vera; der skal dei roa seg i ei god hamning og ganga i feit beitemark i Israelsfjelli,

¹⁵Eg vil sjølv gjæta sauene mine og sjølv få dei til å roa seg, segjer Herren, Israels Gud.

¹⁶Det burtkomne vil eg leita upp, det burtrivne vil eg sanka, det beinbrotne vil eg binda um, og det sjuke vil eg styrkja. Men det feite og det sterke vil eg tyna; eg vil røkta det slik som rett er.

¹⁷Og de, sauene mine, so segjer Herren, Israels Gud: Sjå, eg dømer millom sauer og sauer, millom verar og bukkar.

¹⁸Er det ikkje nok åt dykk at de fær ganga i det beste beite, sidan de trakkar ned det som stend att i beitemarki dykkar? Er det ikkje nok at de fær drikka det klåraste vatnet, sidan de rotar upp med føtene det som er att?

¹⁹Og sauene mine - skal dei eta det som de hev trakka ned, og drikka det som de hev rota upp med føtene?

²⁰Difor segjer Herren, Israels Gud, so til dei: Sjå, eg sjølv kjem og vil døma millom dei feite sauene og dei skrinne sauene.

²¹Etter di de trengjer alle dei veike undan med sida og bog og stangar dei med horni dykkar, til de fær spreidt dei og jaga dei av,

²²so vil eg berga sauene mine, og dei skal ikkje lenger vera til ran, og eg vil døma millom sauer og sauer.

²³Eg vil reisa upp ein hyrding yver dei, og han skal gjæta dei - min tenar David; han skal gjæta dei, han skal vera deira hyrding. /[70]

²⁴Og eg, Herren, vil vera deira Gud, og min tenar David skal vera fyrste millom dei; eg, Herren hev tala

²⁵Eg vil gjera ei fredspakt med dei og rydja ut udyr or landet, so dei trygt kann bu i øydemarki og sova i skogane.

²⁶Og eg vil gjera dei og landet rundt ikring min haug til ei velsigning; eg vil senda regn i rett til; regnskurer til velsigning skal det vera.

²⁷Trei på marki skal gjeva si frukt, og jordi skal gjeva si grøda, og dei skal bu trygt i landet sitt; og dei skal sanna at eg er Herren, når eg bryt sund stengene i åket deira og friar dei or deira hender som trælka dei.

²⁸Dei skal ikkje lenger vera eit ran for folki, og villdyri på jordi skal ikkje eta dei upp; dei skal bu trygt, og ingen skal skræma dei.

²⁹Eg vil lata ein planting veksa upp åt dei som skal gjera dei namngjetne, og dei skal aldri meir verta burtrivne av svolt i landet og aldri meir ljota tola hæding frå heidningfolki.

³⁰Dei skal sanna at eg, Herren, er med dei, og at dei, Israels-lyden, er mitt folk, segjer Herren, Israels Gud.

³¹Og de sauene mine, sauene som eg beiter, menneske er de; eg er dykkar Gud segjer Herren, Israels Gud.